Rêber Apo di 27’ê Sibatê de bangek dîrokî kir, bi wê bangê re bi milyonan dildarên Rêber Apo daketin qadan, her wiha kesên ku Rêber Apo dîtine jî, wê pêvajoyê bi wateya wê ya kûrahiyê fêm dikin. Ebdilrehman Şêx Demir ku yek ji kesên ku Rêber Apo dîtiye, ji ANF’ê re axivî.
Ebdilrehman anî ziman ku jiyana her kesê bi dîtina Rêber Apo re, hate guhertin û got: “Her kes di 15’ê Gulanê yan jî 27’ê Mijdarê de ber bi kampa li Libnanê ve diketin rê û li wir him Rêber Apo didîtin û him jî şahiya xwe ya bi rengê Kurdîtiyê pîroz dikirin. Ji min re bû şansek, ez çûm Akademiyê hîna birayê min şehîd nebibû, birayê min Şehîd Akif li wir bû, min birayê xwe dît lê min Rêber Apo nikarîbû, bidîta. Piştî çend salan bi taybet di 1997’an de em li Helebê li Kolana Kurdî ya Şêx Meqsûdê rûniştibûn. Li wir me gelek caran got ku em dixwazin Rêber Apo bibînin. Carekê hevalan ji me re got xwe amade bikin ku hevalek hatiye ew ê ji we re civînekê pêk bîne, ew ê li dervayî Helebê bi boneya 15’ê Tebaxê civînekê ji we re çêbike. Di wê demê de min nizanîbû ku Rêber Apo ye. Ez li gel mamên xwe çûm. Temenê min hîna 20 salî bû.
Me amadekariya civînê dikir, di wê demê de me nizanîbû ku wê Rêber Apo were. Em li cihekî bi navê Xan Esel bûn. Dema dinya tarî bû, pê re erebeyek jî kete wê baxçeya ku em lê diman. Di wê demê de kesek ji wê erebeyê peya bû, min heyecaneke ne normal hîs kir. Min dît Rêber Apo ye. Ez di nava şewqê de mam, min bawer nedikir ku ez Rêberê xwe hembêz bikim, rû bi rû Rêberê xwe bibînim, pêre biaxivim. Rêber Apo ji me re axivî. Piştre şansê me çêbû ku em Rêber Apo hembêz bikin. Rêber Apo mirovan kaşî xwe dike, mirov nikare dûrî Rêber Apo bikeve, dema ku mirov nêzî Rêber Apo dibe, di çavên wî de, hembêza wî de, axaftinên wî de, tiştekî ne normal heye, ez wiha li bendê dimam ka kengî wê ez ê jî Rêber Apo hembêz bikim. Dema dora min hat min xwe bi hêz xwe avêt hembêza Rêbertiyê, min ew maç kir. Ji ber wê hembêzê û destdana min a Rêber Apo û maçkirina me, min hefteyekê rû û destên xwe neşûşt, min digot bila her hilma Rêbertiyê ji destê min were. Piştî ku êdî em vegeriyan, me biryar dida ku em êdî bi roj û şev bixebitin, em deyndarê Rêber Apo ne, çi ji destê me were jî em ê bikin.”
‘RÊYA RÊBER APO TEQEZ A SERKETINÊ YE’
Ebdilrehman destnîşan kir ku Banga 27’ê ya Sibatê ya Rêber Apo bangeke dîrokî ye û ji bo rizgariya tevahî mirovahiyê ye û got: “Rêber Apo her tiştî lêkolîn dike. Ji destpêka dîroka Kurdayetiyê û heta niha yê ku di roja me ya îro de bi parêzname û manîfestoyan xwe dide naskirin, yê ku pergala hegemoniyê û desthilatê nas kiriye û pênase kiriye, Rêber Apo ye. Êdî Rêber Apo destê desthilatdariyê girê daye. Bi bangên xwe re dawî li qirkirinê tîne. Êdî şoreşa me bi ser ketiye, bi banga Rêber Apo ya dîrokî re pêvajo bi ser ketiye. Çi dibe bila bibe, rêya Rêber Apo teqez rêya serketinê ye.”
