WAN
Bi pêşengiya Tevgera Jinên Azad (TJA), Partiya Wekhevî û Demokrasiyê ya Gelan (DEM Partî) û Meclîsa Jinê ya Partiya Herêmên Demokratîk (DBP) ya Wanê, bi boneya 8’ê Adarê Roja Jinên Kedkar ên Cîhanê li pêşiya Rêxistina DEM Partiyê ya Wanê starta çalakiyên 8’ê Adarê hat dayîn.
Di daxuyaniyê de pankarta “Em li dijî komkujiya jinan serî hildidin, em ji bo azadiyê dimeşin” hatin vekirin û pankartên “Ji 8’ê Adarê heta 21’ê Adarê pira berxwedanê”, “Berxwedan jiyan e”, “An jiyanek azad an berxwedana bi rûmet” û “Şoreş jinan azad dike” hatin hilgirtin. Daxuyaniya bi sernavê “Em li dijî kuştina jinan serî radikin” ji aliyê Aktîvîsta TJA’yê Zîlan Aslan ve hat xwendin.
Zîlan Aslan da zanîn ku weke jinên TJA’yê ji îro û pê ve li Wanê dest bi çalakiyên 8’ê Adarê kirin û got, “Çalakiyên me yên protestoyî wê heta mîtînga 9’ê Adarê li her kolan, her tax, her navçeya Wanê bidomin. Em bang li hemû jinan dikin ku beşdarî 8’ê Adarê bibin, berxwedan û serhildana xwe mezin bikin, hevgirtina xwe mezin bikin. Heta ku li vê erdnîgariyê aştiyeke bi rûmet ava bibe, rêxistina me veguhere azadiya me û jin û zaroke neyên qetilkirin em ê li kolanan bin. Em bi tilîlîliyên xwe têkoşîna xwe mezin dikin.”
Hevşaredara Bajarê Mezin a Wanê Neslîhan Şedal ku qeyûm tayînî şûna wê hat kirin jî axivî û anî ziman ku armanca sereke ya jinan aştiya civakî ye ku ew ber bi 8’ê Adarê ve diçin û wiha dawî li axaftina xwe anî: “Em ji vir bang dikin; Her ku em ber bi 8’ê Adarê ve diçin, ji bo aştiyeke bi rûmet û civakî tenê rêyek heye. Ev rê; Nexşeya rê ya Birêz Abdullah Ocalan e ku ji bo hemû gelan, jin, ciwan, zarok û her kesî felsefeya jiyana hevpar û demokratîk ava kir. Ji ber vê yekê em careke din tekez dikin ku pêvajoya heyî girîng e ku ji bo aştiya civakî diyalog bê avakirin. Ji bo aştiyê divê hemû gel bi berpirsyarî rabin. Weke jinên TJA’yî heta ku li van xakan jiyana azad û wekhev pêk neyê em ê têkoşîna xwe bi rêxistin bikin. Em ê bi ruhê jina azad aştiyê ava bikin.”
Daxuyanî bi çepik, dirûşme û tilîliyan bi dawî bû.
ENQERE
Meclisa Jinan a Konfederasyona Sendîkayên Kedkarên Cemaweriyê (KESK) bi wesîleya 8’ê Adarê li navenda giştî ya sendîkayê civîna çapemeniyê li dar xist. Sekretera Meclisa Jinan a KESK’ê Done Gevher, bertek nîşanî polîtîkayên dijminatiya jinan a AKP’ê da.
Done Gevher bernameya çalakiyan wiha rêz kir:
-1’ê Adarê wê li Nisêbînê Zîncîra Aştiyê ya Jinan were avakirin.
-4’ê Adarê panela bi sernavê “Sala Malbatê’ were lidarxistin.
-3-7’ê Adarê li cihên kar gotubêjên bi miijarê keda lênihêrînê û şixûlîna bêyî ewlehî bên lidarxistin.
-5’ê Adarê ji bo piştevaniya bi girtiyên jin re qert bên şandin.
Di daxuyaniyê de wiha hate gotin: “Li bajarên ku grev lê hene, di rojên ku wê jinên KESK’î diyar bikin de serdanên piştevaniyê ya jinan werin kirin.”
EDENE
Tevgera Jinên Azad (TJA) û Meclîsa Jinan a DEM Partiyê di çarçoveya 8’ê Adarê de li pêşiya navçeya Yuregir daxuyaniya çapemeniyê dan. Hevserokê DEM Partî ya Edeneyê Helîn Kaya wiha got: “Em ê li dijî şerên desthilatdariyên serwer ên mêr, pêşengî ji avakirina aştiyê re bikin. Em ê Şoreşa Jinê ya Rojava biparêzin.”
Helîn Kaya anî ziman ku ew ê 8’ê Adarê bi îlhama ku ji Şoreşa Jinê ya Rojava girtine, biparêzin.
AMED
Li gelek navçeyên Amedê bi pêşengiya şaredariyên DEM Partiyê çalakî hatin lidarxistin.
Muduriyeta Polîtîkayên Jinan a Şaredariya Peyasê û Meclîsa Jinê li Sûka Keda Jinê bi jinan re li hev civiyan.
Di çarçoveya çalakiyên 8’ê Adarê de serdana jinên ku li serayên Muduriyeta Bahçeler hilberandina nebatan dikin, hat kirin.
Hevserokê Şaredariya Peyasê Cengîz Dundar jî tevlî çalakiyê bû û dar hatin çandin.
Muduriyeta Jinan a Şaredariya Sûrê di çarçoveya çalakiyên 8’ê Adarê Roja Jinan a Cîhanê de li Taxa Çarixlî ya Sûrê bi jinan re hat gel hev. Hevseroka Partiya Herêmên Demokratîk (DBP) ya Amedê Sultan Yaray, aktîvîstên TJA’yê û gelek jinên li taxê beşdarî hevdîtinê bûn.
Sultan Yaray di hevdîtinê de axivî û bal kişand ser girîngiya têkoşîna jinê û got ku divê jin di hemû qadan de pêşeng bin.
Di hevdîtinê de ji jinan re sînevîzyonên tenduristiyê hatin pêşandan, piştre jinan bi hev re govend gerand.
Şaredariya Yenîşehîrê jî bi dirûşmeya” Em li dijî qirkirina jinan serî hildin, em ji bo azadiyê dimeşin” li Taxa Cimîka ya navçeya Yenîşehîrê ya Amedê civînek lidar xist.
Hevşaredara Yenîşehîrê Safiye Akdag di çalakiyê de axivî û 8’ê Adarê Roja Jinên Kedkar ên Cîhanê li hemû jinan pîroz kir û diyar kir ku têkoşîna jinan wê bi biryardarî bidome.
Nûnera Navenda Mafên Jinan a Baroya Amedê parêzer Cansel Talay der barê mafên heyî yên jinan de agahî da û bal kişand ser têkoşîna hiqûqî û hevgirtinê.
