Di 13’yê Tîrmehê de li bajarê Siwêyda êrîşên hêzên ewlekariyê yên girêdayî Wezareta Karên Hundir li dijî pêkhateya Durzî dest pê kir. Di wan êrîşan de gelek kiryarên dermirovî li dijî gelê Durzî pêk hatin. Li bajêr û gundewarên Siweydayê êrîşeke çekdarî û berfireh hate kirin. Di gelek belgeyan de eşkere bû ku yekemîn armanca çekdarên HTŞ’ê û DAÎŞ’ê ew bû ku li ser gelê Durzî qirkirinê pêk bînin.
Di encama wan êrîşan de gelek kes hatin qetilkirin, revandin, serjêkirin û malên wan talankirin. Yek ji wan komkujiyan roja 16’ê Tîrmehê ku li ser nexweş û hemşîreyên Nexweşxaneya El Wetanî pêk hat. Çekdarên ewlekariyê yên girêdayî Wezareta Karên Hundir a hikûmeta demkî bi hevkariya Artêşa Mîllî ya Sûrıyeyê (SMO) li nexweşxaneyê komkujiyeke dermirovî pêkanîn.
ANF’ê xwe gihand çekdarên ku ji aliyê Durziyan ve hatine girtin ku hin ji wan hîn di temenê zarokatiyê de ne. Çekdarên di destê Durziyan de, tekez kirin ku ev komkujî û kiryarên ku li ser gelê Durzî hatî kirin, li ser talîmata Wezareta Parastinê ya Sûriyeyê pêk hatine.
‘TALÎMATA QIRKIRINA DURZIYAN’
Endamê koma 62’an a girêdayî Mihemed Casim ”Ebû Amşa” Mihemed Ebdullah El-Elawî yê ku di sala 2007’an de ji dayik bûye, ev tişt gotin, “Seferberî hate îlankirin ku wê şer li Siwêdayê biqewime. Em hemû çekdar tevî tang, top û erebeyan komkirin û me ji Deraayê re derbasî Siwêdayê kirin. Nêzî bajarê Siwêdayê talîmat ji me re hat ku çi hat pêşiya me biçûk an mezin ferq nake em ê lêdin, em ê qirkirinekê bi temamî pêk bînin. Em derbasî Siwêdayê bûn û li kijan malê me kesek bidîta me dikuşt. Bi RPG û tangan li ber hinek malan disekinîn û lê didan, me mal û erebeyên sivîlan şewitandin. Piştî ku ez derbasî Siwêdayê bûm, hatim girtin.”
‘CÎHADA LI SER TINEKIRINA DURZIYAN’
Mehmûd Talal El-Matar ê ji Deraayê ye û di sala 2009’an de ji dayik bûye, di nava êrîşan de cih girt. Mehmûd ê ku niha di destê komên girêdayî Durziyan de ye, diyar kir ku piştî di mizgeftan de banga cîhadê kirin ew jî tevlî nav komên çekdar bû û got, “Li gundê me El-Sehwa di mizgeftan de û bi rêya erebeyên mezin di nav gund de bang kirin ku wê li dijî Durziyan cîhad were kirin. Em li cihên hêzên ewlekariya giştî kombûn û li wir çek li me belav kirin. Talîmatên ku li wir dane me bi vî awayî bûn ku em kî/ê bibînin, biçûk be yan mezin be ferq nake em ê serjêkin. Em gihîştin nêzî Siwêdayê ji me re gotin ku we çi dît hûn ê bişewitînin û xera bikin. Bi vî awayî me dest pê kir. Me talîmatên ku dabûn me pêk anîn û em heta navenda bajêr wisa çûn û li wir hatim girtin.”
‘JI ME RE GOTIN JINAN DÎL BIGRIN’
Bedir Mihemed El Kedam ê ku di sala 2008’an de ji dayik bûye, girêdayî Wezarata Parastinê ya Sûriyeyê bû û di koma Seyîda Zêneb a girdayî Ebû Hatim El Domanî de cih girtiye got, “Serfeberî îlan kirin û li ser vê bingehê me berê xwe da Siwêdayê. Dema em gihîştin Siwêdayê me kom kirin û talîmat dan me. Ji me re gotin ‘Hûn ê biçin bikujin, jinan dîl bigrin, malan bişewitînin û xera bikin. Hûn ê her kesî bikujin’. Em wisa meşiyan. Me talîmatên ji me re hatin gotin pêkanîn. Heta ku em gihîştin gundê Um El Zeytûnê, me sivîl hedefgirtin û her tişt şewitandin. Kesên li derve, li malan, li erebeyan û li her derê derdiketin pêşiya me, me wan gulebaran dikir û dikuşt.”
