Cenazeyê şervanê Hêzên Sûriyeya Demokratîk (QSD) Hemo (Mihemed El Ewed) yê 6’ê Gulanê de di êrîşa çeteyên DAÎŞ’ê de şehîd bûbû, li Pakrewangha Şehîd Dijwar hat veşartin. Bi sedan sedan şêniyên bajar û gundewarê Hesekê, koçberên ji Efrîn û Serêkaniyê tevlî merasîmê bûn.
Girseyê cenazeyê şehîd ji Morga Şehîdan a bajarokê Sifeya hat girtin û bi karwanekî ber bi Pakrewangeha Şehîd Dijwar a li gundê Dawudiyê ve bi rê ket. Girse dema gihîşt pakrewangehê bi dirûşma “Şehîd namirin” ji aliyê gel ve hat pêşwazîkirin û merasîmek hat lidarxistin.
Merasîm bi deqeyeke rêzgirtin dest pê kir. Axaftina Meclîsa Malbatên Şehîdan ji aliyê endamê meclîsê ve Ehmed El Hirês ve hat kirin. Ehmed El Hirês di axaftina de sersaxî da malbata şehîd û got: “Bi navê Meclîsa Malbatên şehîdan em sersaxiyê ji xwe, ji malbata şehîd û ji hêzên xwe yên leşkerî re dixwazin. Em bejna xwe li hemberî şehîdan û dayikên wan re ditewînin. Şehîd wê her tim di dil û bîra me de bin. Şehadet ji bo her malbatekê şehîd re cihê serferazî û şanaziyê ye; ji ber ku şehîd ji bo parastina malbat, hevrê û welat û gelê xwe canê xwe feda kir.”
El Hirês di dewama axaftina xwe de anî ziman ku şehîd Mihemed ji şervanekî çalak ê QSD’ê bû û wiha pê de çû: “Ji hevalên xwe hez dikir, xwedî exlaqekî bilind û ruhekî hevalatiyê bû. Heta gihîşt asta şehadetê erkê xwe ya parastina destkeftiyên şehîdan bi cih dianî.”
Li ser navê hêzên leşkerî jî Birûsk Hesekê axivî û wiha got: “Bi navê hêzên leşkerî yên Kantona Cizîrê, bi navê QSD, YPG, YPJ û Hêzên Erka Xweparastinê em bejna xwe li hemberî mezinahiya şehîdên xwe yên leheng ên ku ji bo azadî, rûmet, jiyana hevbeş û yekîtiyê canê xwe feda kirine ditewînin. Em dibêjin bila serê malbata şehîd û tevahiya gelê me sax be. Di kesayeta şehîd Mihemed de em tevahî şehîdên azadî û rûmetê bi bîr tînin. Şehîdan bi xwîna xwe ya pak rêya azadî û serkeftinê nîşanî me dan û nixên projeya neteweya demokratîk îfade kirin. Bi navê hêzên leşkerî em soz didin şehîdan û malbatên wan ku em ê heya pêkanîna xeyalên şehîdan şopdarên rêya wan bin.”
Piştî axaftinan, endama Meclîsa Malbatên Şehîdan a Hesekê Maya El Elî wesîqeya şehîd xwend û radestî malbata wî kir.
Girseya gel cenazeyê şehîd bi dirûşmên “Şehîd namirin” û tilîliyên dayikan spartin axê.
