Hevseroka Meclîsa Demokratîk a Şengalê Cîhan Celo, diyar kir ku banga Rêber Apo ya bi dîmen, bandorek kûr a moralê li ser civaka Êzidî çêkiriye û destnîşan kir ku azadiya fîzîkî ya Rêber Apo ji bo pêşveçûna pêvajoya aştiyê girîng e.
Cîhan Celo, anî ziman ku Rêber Apo bi banga xwe hewldanên qirkirina siyasî pûç kiriye û ruhê berxwedanê xurt kiriye.
Cîhan Celo, diyar kir ku civaka Êzidî ji banga Rêber Apo pir bandor bûye û bi taybetî fermana 2014’an bi bîr xist û got, “Rêber Apo her tim gelê Êzîdî di rojeva xwe de digire, êş û xiyaneta dîrokî ya ku civaka Êzidî jiyane eşkere dike.”
Cîhan Celo, behsa girîngiya banga ‘Aştî û Civaka Demokratîk’ a ku Rêber Apo di 27’ê Sibatê de da dest pê kirin kir û got, “Pêvajo ji wê demê ve bi hewldana aliyek bi rêve diçe. Di vê pêvajoyê de PKK’ê kongreya xwe ya 12’emîn lidar xist, biryara fesixkirin û bidawîkirina şerê çekdarî girt. Divê Tirkiye ji bo serketina pêvajoyê gav bavêje.”
Cîhan Celo, diyar kir ku banga aştiyê ne tenê ji bo Tirkiyeyê, di heman demê de ji bo Iraqê û welatên derdorê jî girîng e û bi taybetî destnîşan kir ku divê Iraq têkiliyên xwe bi gelê Êzîdî re ji nû ve li ber çavan bigire.
Cîhan Celo, da xuyakirin ku ji bo pêvajo mayînde be, divê azadiya fîzîkî ya Rêber Apo were misogerkirin û got ku civaka Êzidî ya li Şengal bi hemû hêza xwe piştgiriyê dide vê daxwazê. Celo, diyar kir ku pêvajoya aştiyê û azadiya Rêber Apo nikarin ji hev cuda werin destgirtin û ev her du mijar bi hev ve girêdayî ne û hevûdu temam dikin.
