Li gorî tê payîn wê hilbijartina parlamento ya li Sûriyeyê di vê mehê de bê lidarxistin. Têkildarî mijarê Siyasetmedarê Kurd Bekir Hec Îsa, Endamê Komîteya Navendî a Partiya Demokratîk a Kurd a Sûriyeyê Gêlo Îsa, Rêveberiya Meclîsa Jin a Partiya Yekîtiya Demokratîk Bedîa Miho ji ANF’ê re axivîn û diyar kirin ku ev hilbijartin nûnertiya îradeya hemû pêkhateyên Sûriyeyê nake.
Bekir Hec Îsa got, “Ev hilbijartin yekalî ne û îradeya gel nîşan nadin. Em van hilbijartinan qebûl nakin. Wan pêşî kongreya xwe lidar xistin û piştre destûran jî li gorî xwe sazkirin. Niha jî dixwaze bi biryara xwe tenê hilbijartina parlamentoyê lidar bixe. 50 sal in li Sûriyeyê rejîmeke zordar hebû; niha hikûmeta heyî tenê aliyekî temsîl dike. Ev hilbijartinên ku dê li Sûriyeyê pêk bê, xizmetê ji gelên Ereb, Aşûr, Sûryanî, Kurd û neteweyên din re nake. Sûriyeyeke demokratîk hikûmeteke piralî, pirreng û berfireh dixwaze.”
DIVÊ DESTÛREKE DEMOKRATÎK Û PARASTINA MAFAN HEBE
Îsa, anî ziman ku divê destûreke nû ya demokratîk bê amadekirin û wiha domand, “Divê di vê hilbijartinê de mafê hemû pêkhateyan bê parastin. Gelê Kurd niha li Bakur û Rojhilatê Sûriyeyê demokratîkbûn û pir rengiya gel dane pêş. Hemû pêkhate mafê xwe têde diparêze, QSD demokratîkbûnê diparêze. Çekên QSD’ê misogeriya demokratîk e. Lê desthilatdara îslamî naxwaze şeriyeta xwe ji hundir bigre. Çawa ku hikûmeta Bassê ji Îranê talîmatên xwe digrin, niha jî hikûmeta nû ya veguhêz jî talîmatên xwe ji Enqereyê digre. Ev rêbaz berê bi ser neket, niha jî bi ser nakeve.
Divê em Sûriyeke nenavendî ava bikin û li gorî wê hilbijartin bê kirin. An wê alozî kûrtir bibin. Em niha li Siwêda û berava Sûriyeyê dibînin, divê Sûriyeke nenavendî û piralî bê avakirin.”
ROL Û AZADIYA JINAN
Hevseroka Meclîsa Jinan a PYD’ê Bedîa Miho, jî bal kişand ser rola sereke ya jinan li Sûriyeyê û wiha got, “Jin nîvê civakê pêk tînin. Ew di her warî de wekî siyasetmedar, mamoste, dayik, şervan û parêzvan pêşengiyê dikin. Li Siwêda û berava Sûriyeyê bi hezaran jin di encama êrîşên çeteyên girêdayî hikûmeta veguhêz a Sûriyeyê de, hatin qetilkirin. Hişmendiya hikûmeta veguhêz û çeteyên girêdayî wê mîna ya DAÎŞ’ê ye. Divê rola jinan were parastin û xurtkirin.
Wekî ku Rêber Apo got, ‘heke jin azad nebin, civak nikare azad be.’ Jinên azad şertê bingehîn ê Sûriyeyek demokratîk e.
Elewî û jinên din ên kêmneteweyan di demên berê de hatine hedefgirtin. Niha, divê hemû komên etnîkî û mezhebî li seranserê Sûriyeyê mafên wekhev biparêzin. Divê jin pêşengiyê bikin û rolek çalak di civakê de bigirin.”
EV HILBIJARTIN NAYÊ QEBÛLKIRIN
Endamê Komîteya Navendî ya Partiya Demokratîk a Kurd a Sûriyeyê Gêlo Îsa, da zanîn ku Herêmên Rêveberiya Xweser a Demokratîk ji van hilbijartinan bêpar in û got ku hikûmeta Veguhez a heyî tenê berjewendiyên xwe diparêze. Îsa, diyar kir ku polîtîkayên hikûmetê îradeya gel paşguh dike, mafên mirovan binpê dike û bûye sedema mirina bi deh hezaran kesan û got ku ji ber vê yekê, hilbijartin nayên qebûlkirin.
Îsa, her wiha bal kişand ser polîtîkayên zext û tundûtûjiya hikûmeta Veguhez li dijî jin û kêmneteweyan û got, “Gelek jin, bi taybetî jinên Elewî û Durzî, hatin hedefgirtin û mafên wan hatin binpêkirin.”
Îsa, destnîşan kir ku li Sûriyeyê pêdivî bi avakirina civakek demokratîk û cihêreng heye ku hemû komên etnîkî û mezhebî bibin xwedî mafên wekhev. Îsa got ku hilbijartinên yekalî dê vê yekê bi dest nexin.
