Li gundê Dêrikê yê herêma Elegezê ya Ermenistanê cejna Xidir Nebî hate pîrozkirin.
Êvara 20’ê Sibatê Kose Geldî bi cilê ji postê heywanan li xwe kir, bi def û zirne heta derengiya şevê li nava malan geriya û cejn pîroz kir.
Muzîkvan Rizgan Xodoyan anî ziman ku 40 sal in ew ji bo Kose Geldî li zirnê dixe, ku civaka wan çanda xwe ji bîr neke.
Xodoyan got, “Em li ser axa xelkê dijîn. Eger em xwedî li çanda xwe dernekevin, em ê xilas bibin. Dixwazim welatê me azad bibe. Em çanda xwe li ser axa xwe nîşan bidin.”
Malîko Mûradyan ê li defê dixe jî got, “Ji bo ciwanên me çanda xwe ji bîr nekin, em weke ciwan her sal Kose Geldî digerînin. Ji ber ku ev çand ji bav û kalê me hatiye, em ê heta dawiyê biparêzin.”
