Gerîlayên YJA Starê yên li lûtkeyên çiyayên Garê têkoşîna xwe didomînin, bi boneya 30’yemîn salvegera şehadeta Zîlan (Zeynep Kinaci), ji ajansa me ANF’ê re axivîn.
‘HEVRÊ ZÎLAN BI ÇALAKIYA XWE JI PÊVAJOYÊ RE BÛ BERSIV’
Gerîlaya YJA Starê Pervîn Bîrhat li ser wateya vê rojê wiha axivî, “Hevrê Zîlan di sala 1996’an de bi çalakiya xwe ji pêvajoyê re bû bersiv. Em wekî gerîlayên jin di xeta wê de dimeşin. Ew ji bo me mînak e û xwedî felsefeyekê ye. Bi saya sekna hevrê Zîlan em gihiştin van rojan. Hevrê Zîlan bi sekn, hevrêtî û jiyana xwe çalakvanek xurt bû. Li dijî tasfiyebûnê helwestek mezin raber kir. Hevrê Zîlan pêvajo rast fêm kiribû. Wê rêya ku em tê de bimeşin nîşand da. Tişta herî rast ew e ku em kesayeta hevrê Zîlan di jiyana xwe de bidin rûniştandin.”
‘HEVRÊ ZÎLAN PÊVAJOYÊ RAST FÊM KIR’
Gerîlaya YJA Starê Delîla Bîrhat jî behsa çalakiya fedaî ya şehîd Zîlan kir û ev tişt gotin, “Di nava jiyana rêxistinê de bûyîna fedaiyek ne tiştek hêsane. Hevrê Zîlan pêvajo rast fêm kir. Ji pêvajoya 1996’an re bû bersiv. Ji bo vê jî di nava jiyana rêxistinê de bûyîna fedaiyek tiştekî pir girîng e. Fedaîbûn nayê wateyê tenê tu biçî di nava dijmin de xwe bi teqînî, di nava jiyanê de fedaîbûyîn jî ji bo me bingehek e. Li ser şopa Zîlan têkoşîn kirin armanca me ya herî bingehîn e. Tevî ku şervana salekî bû jî fikrê ku di xwe de avakiribû û pêş xistibû pir mezin bû. Hevrê Zîlan fikir û felsefeya Rêber Apo di demeke kurt de fêm kir. Rêber Apo ji bo wê dibêje ‘Zîlan xwedawenda azadiyê ye’. Peywira dikeve ser milê me ew e ku em bibin şopdarên jiyan û têkoşîna wê. Weke jinên têkoşer divê em tu carî xeta hevrê Zîlan ji bîr nekin.”
‘HEVRÊ ZÎLAN NÎŞANÎ ME DA KU EM Ê ÇAWA BIJÎN’
Gerîla Zîlan Kobanê hemû şehîdên şoreşê bi bîr anî û got, “Mirov li beramberî kesayeta hevrê Zîlan kêm dimîne. Hewldana me ew e ku em layiqî wê bin. Rêber Apo dibêje, ‘Zîlan fermandara min e’. Hevrê Zîlan nîşanî hemû jinên cîhanê da ku jina Kurd a pêşeng dê çawa be. Îro bi hezaran Zîlan hene û bi sedan Zîlan şehîd bûne. Îro em hemû jin cesareta xwe ji hevrê Zîlan digirin. Helwesta wê li dijî jiyana şaş bû û vê yekê bandoreke mezin li ser me kir.”
