Karavana Gelan a ji enternasyonalîstan pêk tê, ji bo piştgiriyê bidin berxwedana Rojava hatin navçeya Pirsûsê ya Rihayê. Li ser vê yekê polîsan enternasyonalîstên hatine binçav kir û piştre dersînor kir. HDK’ê li dijî binpêkirina mafan ên li dijî endamên Karavana Gelan hatine sepandin li ser hesaba xwe ya medya dîjîtal daxuyanî da.
HDK’ê di daxuyaniyê de diyar kir ku 29 enternasyonalîst li gel HDK û DEM Partiyê êvara 29’ê Çileyê ber bi Pirsûsê bi rê ketine û wiha got: “Karavana Gelan a ku bi dirûşm û stranan ve ketin rê, li gel hewldanên sîstematîk ên ji bo astengiya rêwitiya wan, di 30ê Çileyê da nîvro gihîştin Pirsûsê û berxwedana Kobanê silav kir. Ev mîrate piştevaniya enternasyonalîs xurt dike. Hevrêyên me tevî xetereya dersînorkirin û girtinê xwedî li Rojava derkevin û gotin ‘an em ê Rojava biparêzin an jî em ê dersînor bibin” û li dijî sînoran piştevaniya enternasyonalîst bilind kirin.”
Di dewama daxuyaniya xwe de HDK’ê bal kişand ser binpêkirinên piştî binçavkirina endamên Karavana Gelan û wiha got: “Li Navendên Vegerandinê û dema binçavkirinê li dijî hevrêyên me sepanên wek lêgerîna tazî, tundiya zayendî û lêdanê hatin pêkanîn. Li dijî vê yekê têkoşîna me ya li dijî tuniyê tevî Komeleya Hiqûqnasên ji bo Azadiyê (OHD) û Partiya Demokrasî û Wekheviyê ya Gelan (DEM Partî) bi awayekî xurt hatiye kirin. Her wiha di heman rojan de Delegasyona Ciwanan a ku li ser banga Meclisên Ciwanan a DEM Partiyê hatibûn Amedê jî hatin binçavkirin, bi tundî û dersînorkirinê re rû bir û man. Yekitî û têkoşîna me dê van êrişan têk bibe.”
