Di Kampa Holê de operasyona berfireh a li dijî DAÎŞ’ê, bi hevkariya Hêzên Ewlekariya Hundirîn a Bakur û Rojhilatê Sûriyeyê, Hêzên Ewlekariya Hundirîn a Jin, Yekîneyên Parastina Jin (YPJ) û Hêzên Sûriyeya Demokratîk (QSD) didome. Operasyon, ku armanca wê ewlehiya Kampa Holê ye, yek ji cihên herî metirsîdar ê herêmê ye. Hêzên beşdar, ji bo sazkirina aramiyê li kampê û derdora wê bê navber dixebitin. Heya niha 16 endamên DAÎŞ’ê, ku hin ji wan di êrîşên li dijî civakê de cih girtibûn, hatin girtin. Her wiha, gelek cebilxane hatin desteserkirin. Ji bo bi temamî rakirina xeteriya DAÎŞ’ê xebat bê navber didomin û heya ku ewlehiya kampê bi temamî pêk were, operasyon wê berdewam bike.
Der barê operasyona Kampa Holê ya di 18’ê Nîsanê de destpê kir de, Berdevkê Hêzên Sûriyeya Demokratîk Ebcer Dawûd û Endama Hêzên Ewlekariya Hundirîn a Jin a Bakur û Rojhilatê Sûriyeyê Bahar Abbas ji ajansa me ANF’ê re axivîn.
Ebcer Dawûd, anî ziman ku valatiya ewlekarî û siyasî ya ku rêjîma nû a Sûriyeyê di nav pêkhatiyan de pêk anî, hişt ku DAÎŞ xwe di nav gel de belav bike û metirsiyekê bide avakirin.
Ebcer Dawûd got: “Ji ber vê yekê piştî van geşedanan weke Hêzên Ewlekariya Hundirîn me biryar da ku operasyonek berfireh li Kampa Holê bidin destpêkirin. Ev jî bi armanca ewlehî û aştiyê ye. Ev operasyon jî bi biryardayîna Hêzên Sûriyeya Demorkratîk û Yekîniyên Parastina Jin û hevkariyan wan tê meşandin.”
ARMANCA OPERASYONÊ EWLEKARIYA HERÊMÊ YE
Ebcer Dawûd, diyar kir ku tevî rewşên ewlekarî û siyasî yên heyî jî, Hêzên Ewlekariya Hundirîn karîbûn xwe bixin nava karek zehmet de û wiha domand: “Armanca operasyonê ewlekariya herêmê ye. Heya astekê xwe dighîne serketinan û ewlehiyê pêk tîne. Di heman demê de ev pêngav bi saya Hêzên Ewlekariya Hundirîn pêk tê, bi hemû hêza xwe dixwazin ku destkeftiyên projeya Rêveberiya Xweser biparêzin.”
‘PÊWÎSTE JIN Û ZAROKÊN DI VÊ KAMPÊ DE JI FIKRÊ YEK ALÎ RIZGAR BIBIN’
Ebcer Dawûd, destnîşan kir ku ev operasyon bi serkeftî derbas dibe û got: “Bi giştî ewlekariyek di hundirê vê kampê de hat avakirin. Di hema demê de tiştek di derheqê sivîlan de nehat kirin. Em heya dawî ji bo aştî û ewlekariya sivîlan têdikoş in û hewldanên DAÎŞ’ê ya ji bo xirabkirina civakê, têk bibin.”
‘DIVÊ ZAROK Û JIN JI HIŞMENDIYA DAÎŞ’Ê WERIN RIZGAR KIRIN’
Bahar Abbas, di destpêka axaftina xwe de anî ziman ku ev operasyon ne tenê ji bo girtina çeteyan ne, ji bo rakirina hişmendiya yekalî ya di aqilê jin û zarokan de ku bi riya DAÎŞ’e hatine bicih kirine û got: “Em dixwazin ku jin û zarokên di vê kampê de xwedî ewlehî bin. Di vê operasyonê de hat xuyakirin ku amûrên lîstikê yên ji bo zarokan tê bikaranîn hemû bi awayek tund tên lîstandin û ev jî nîşan dide ku fikrê DAÎŞ di aqilê wan de hatiye çandin.”
Bahar Abbas, anî ziman ku ev operasyon bi hemû amûrên ewlehî tê meşandin û wiha pêde çû: “Xeteriya ku DAÎŞ ji nûve zindî bibe li her cihî heye. Dema me ev operasyon dest pê kir ne tenê ji bo ewlehiya kampê ji bo giştî heremê bû. Armanca sereke ew e ku fikrê DAÎŞ’ê di serê jin û zarokan de nemîne. Ji ber ku şerê li herêma Bakur û Rojhilatê Sûriyeyê rû bi rû dide ne tenê şerekî çekdarî ye, di heman demê de ev şerek taybet e.”
‘SERKEFTIN HER DEM WÊ YA ME BE’
Bahar Abbas di dawiyê de jî got: “Ev oparasyon ji bo parastina projeya Rêveberiya Xweser e. Her wiha ji bo avabûyîna civakek xwedî hişmendiyek azad û demokratîk e. Bila gelê me bi Hêzên Ewlekariya Hundirîn her ti bawer be, ji ber em di her kêliyê de ji bo ewlehiya gelê xwe têdikoş in. Pêwîste em hemû zehmetiyan derbas bikin û bi hêza xwe bawer bin. Ji ber ku serkeftin wê her dem ya me be.”
