Li gorî raporê, hikûmeta demkî ya ku di Adara 2025’an de hate damezrandin û ji aliyê serokê berê yê HTŞ’ê Ehmed Şara ve hate birêvebirin, daxuyaniya destûrî ya ku rayeya berfireh dide rêveberiyê weşand. HRW’ê diyar kir ku ev yek kontrola serokatiyê ya girîng li ser dadwerî û yasadanînê çêkir û mekanîzmayên çavdêriya demokratîk qels kir.
Rêxistinê destnîşan kir ku hikumeta demkî saziyên nû ji bo edaleta veguhêz û ji bo aşkerakirina çarenûsa bi hezaran kesên winda ava kirin, lê rola rayedarên leşkerî û sivîl ên payebilind di tundî û kuştinên li ser bingeha nasnameyê de ku di Adar û Tîrmeha 2025`an de, bi taybetî li Laziqiyê, Tartûs, Hama û Siwêdayê qewimîn, baş zelal nekir.
Di raporê de wiha hat gotin: “Divê rayedarên Sûriyeyê hesabê ji hemû aliyên ku binpêkirin kirine, bixwaze û ne tenê lêpirsîna sûcên takekesî bike.”
HRW’ê diyar kir ku rakirina cezayên Amerîkayê û Ewropayê yên li ser Sûriyeyê di sala 2025`an de, tu başbûneke berbiçav di jiyana xelkê Sûriyeyê de çênekiriye. Zêdetirî sedî 90`ê xelkê Sûriyeyê di bin xeta xizaniyê de dijîn.
Rêxistinê bang li hikumeta demkî kir ku “mafên bingehîn ên hemû gelên Sûriyeyê bêyî cudahî biparêze” û reformên cidî yên ewlehiyê pêk bîne û “kesên tev li binpêkirinan bûne dûr bixe.”
