Wezîrê Karên Derve yê Îranê Abbas Arakçî ji ajansa nûçeyan a IRNA’yê re axivî û got: “Ev bersiva fermî, helwesta me ya li hemberî rewşa heyî û nameya Birêz Trump tam eşkere dike.”
Arakçî destnîşan kir ku name ji Sultaniya Ummanê re jî hatiye şandin. Hêjayî bibîrxistinê ye ku dema ku di navbera Îran û Dewletên Yekbûyî yên Emerîkayê (DYE) de têkiliyên dîplomatîk nebin, Sultaniya Ummanê navbeynkariyê dike.
Arakçî têkildarî hûrgiliyên bersivê zêde agahî nedan.
Donald Trump di van demên dawîn de dibêje ku ji bo sererastkirinên nukleerî ew amade ne li gel Tehranê muzakereyan pêk bînin.
Serokê DYE’yê Trump di destpêka meha Adarê de ragihandibû ku têkildarî mijara berbehs ji serokên Îranê re name nivîsandine.
Trump di heman demê de polîtîkayên ‘zextê’ yên li ser Îranê didomîne û gefan li Îranê dixwe ku dibêje ger Îran muzakereyan red bike, ew ê cezayên din li Îranê bibire û operasyona leşkerî bide destpêkirin.
Arakçî jî diyar kir ku ew ê polîtîkaya muzakerekirina ne di bin zext û gefan de bisepînin û got: “Weke beriya niha dibe ku muzakereyên nerasterast werin kirin.”
Ji sala 1980’yî ve ye di navbera Îran û DYE’yê de têkiliyên dîplomatîk nînin. Lê belê her du welat, li Îranê bi navbeykariya Balyozxaneya Swîsreyê ya li Tehranê di nava danûstandinan de ne. Sultaniya Ummanê jî beriya niha di navbera her du hêzan de navbeynkarî kiribû. Her wiha Trump nameya xwe bi rêya Mîrnişînên Yekbûyî yên Ereb şandibû.
