Cenazeyê şervanê Meclisa Leşkerî ya Minbicê Ebû Leyla (Ezedîn Silo) ê 29`ê Çileya 2025`an li Bendava Tişrînê şehîd bûbû, şervanên QSD`ê Mihemed Îsmaîl (Mihemed Ismaîl) ê 10`ê Sibata 2025`an li Kobanê, Elîşêr (Elî Oso) ê 9`ê Sibata 2025`an li Kobanê û Elî (Elî Xelîl Selcûk) ê 9`ê Sibata 2025`an li Kobanê şehîd bûbûn, îro bi merasîmekê li Pakrewangeha Şehîd Dîcle hatin veşartin. Di merasîmê de şervnên Hêzên Komandos Îsmaîl jî (Îsmaîl Elî) ê 9`ê Kanûnê li Minbicê, şervanê QSD`ê Burkan (Ebdulqadir Betal) ê 8`ê Kanûna 2024`an li Minbicê şehîd bûbûn hatin bibîranîn.
Bi sedan şêniyên kantona Firatê, endam û rêveberên saziyên sivîl, partiyên siyasî û saziyên Rêveberiya Xweser ji bo beşdarî merasîmê bibin li pakrewangehê kom bûn.
Merasîm bi deqeyek rêzgirtinê dest pê kir, piştre ji rêveberên Meclisa Leşkerî ya Kobanê Îsmaîl Îsmaîl sersaxî ji malbatên şehîdan re xwest û soza şopandina rêya şehîdan da.
Îsmaîl diyar kir ku ew ê heta dawiyê şopdarên şehîdên xwe bin û wiha pê de çû: “Şervanên me li hemberî êrîşên dewleta Tirk a dagirker berxwedaneke dîrokî didin meşandin. Em ê her tim piştgiriya şervanên xwe bikin û xwîna şehîdan li erdê nehêlîn.”
Rêvebera Meclisa Kongra Star a bajarê Qinê Sûad El Demir jî destnîşan kir ku ew ê tola şehîdên xwe rakin û wiha got: “Em ê destkeftiyên ku şehîdên me ji me re hiştinê biparêzin û xeta berxwedanê berdewam bikin.”
Rêveberê Meclisa Malbatên Şehîdan a bajarê Kobanê Hesen Îbrahîm jî diyar kir ku şehîdan ji bo parastina axa xwe canê xwe feda kirin û got: “Şehîdên me ji bo parastina axa xwe canê xwe feda kirin û bi saya şehîdan em gihiştin vê astê, divê em destkeftiyên şehîdên xwe biparêzin.”
Li ser navê malbata şehîd Elî jî Bozan Dalî jî sersaxî ji malbatên hemû şehîdan re xwest û diyar kir ku şehîdên azadiyê li hember êrîşên dewleta Tirk û çeteyên wê berxwedaneke dîrokî didin meşandin. Bi berxwedana xwe destanan dinivisînin.
Piştî axaftinan wesîqeyên şehîdan hate xwendin û radestî malbata wan hate kirin.
