Meclîsa Jinan a DEM Partiyê ji bo ronîkirina mirina Rojîn Kabaîş a ku li Wanê bi rengekî bi guman jiyana xwe ji dest da, bang kir.
Meclîsa jinan diyar kir ku lêpirsîna piştî mirina Rojîn Kabaîş hate meşandin, ne têrker e û got, cînayetên jinan bi destê saziyên dewletê tên nixumandin.
Di daxuyaniyê de bertek nîşanî wê yekê hate dayîn ku waliyê bajêr beriya otopsiyê mirina wê weke “xwekujî” nirxand û hate diyarkirin ku tevî îspatên nû têkildarî mirina Rojîn Kabaîş derketine holê jî, rayedarên hikûmetê bêdeng in.
Meclîsa Jinan a DEM Partiyê diyar kir ku li gorî rapora Saziya Tiba Edlî di mîde û lebetên hundir ên Rojîn Kabaîş de maddeyên îlacan hatine tespîtkirin.
Di daxuyaniyê de bang li Wezareta Tenduristiyê û Wezareta Edaletê hate kirin ku bersiva van pirsan bide:
“Madeyên îlacên hatine tespîtkirin, ji kuderê hatin?
Kî û kengê ev îlac dan Kabaîş?
Gelo qeydên nexweşxaneya ku emeliyat lê hate kirin, hatin lêkolînkirin?
Gelo ji bo îfadeyên bijîjkê wezîfedar û xebatkarên tenduristiyê serlêdan hate kirin?
Gelo çima îspatên navborî nebûn mijara lêpirsîneke berfireh?”
Meclîsa Jinan diyar kir ku bersivdayîna van pirsan di têkoşîna li dijî tundiya li hemberî jinan û cînayetên jinan de wê bibe nîşaneya nêzîkatiya dewletê jî.
Di daxuyaniyê de wiha hate gotin, “Ronîkirina cînayeta Rojîn Kabaîş deynê vê desthilatdariyê yê li hemberî jinan e.”
