Bi wesîleya rojbûna 76’an a Rêber Apo wê di navbera 3-4’ê Nîsanê de li navçeya Xelfetî ya Rihayê festîval bê lidarxistin.
Platforma Saziyên Demokratîk li gundê Amarayê li ber mala ku Rêber Apo lê ji dayik bû û mezin bû, daxuyaniyek da.
Li gel şêniyên gund Parlamentera Amedê ya Partiya Demokrasî û Wekheviyê ya Gelan (DEM Partî) Ceylan Akça, Hevşaredarên Xelfetiyê yên qeyûm li şûna wan hate danîn Saniye Bayram û Mehmet Karayilan beşdarî daxuyaniyê bûn.
Li dîwarê mala ku daxuyanî li ber hate dayin, wêneyên Rêber Apo yên berê hatibû kişandin, hate daliqandin.
Aktîvîsta Tevgera Jinên Azad (TJA) Mulkiye Gulmez got, “Di serî de jin em li benda her kesî ne ku beşdarî çalakiyên 4’ê Nîsanê bibin. Em li benda her kesî ne ku piştgiriyê bidin meşa ku îro ciwanan dan destpêkirin.”
Piştre Hevserokê Federasyona Komeleyên Piştevaniya Hiqûqî ya bi Malbatên Girtî û Hikumxwaran re (TUHAD-FED) Kerem Canpolat axivî û xwest, tecrîda li ser Rêber Apo bê rakirin.
Kerem Canpolat got, “Banga Birêz Ocalan a 27’ê Sibatê ji bo wê yekê hate kirin ku dayik negirîn, ciwan neyên qetilkirin. Ji bo destê Birêz Ocalan xurt bikin divê em xwedî li vê bangê derkevim. Xwedîderketina li 4’ê Nîsanê xwedîderketina li azadî û aştiyê ye. Îsal wê bibe sala azadî û berxwedanê. Em li benda gelê xwe ne ku beşdarî vê festîvalê bibe. Birêz Ocalan îradeyeke mezin nîşan da, ya ku dibe para me jî xwedîderketina li vê yekê ye. Birêz Ocalan gav avêt, dor a dewletê ye. Ji bo pêkanîna azadiya fîzîkî ya Birêz Ocalan divê em hîn bêhtir li dora 4’ê Nîsanê bicivin.”
