Li gorî nûçeya Ajansa Mezopotamyayê parêzerên Buroya Hiqûqê ya Sedsalê têkildarî Rêberê Gelê Kurd Abdullah Ocalan û muwekîlên wan ên din ên li Îmraliyê tecrîdkirî ne Omer Hayrî Konar, Hamîlî Yildirim û Veysî Aktaş di 17’ê Gulanê de serlêdana ‘çalakiya lezgîn’ li Raportê Taybet ê Êşkenceyê yê Neteweyên Yekbûyî kirin. Parêzeran serî li raportoriya taybet da ku bi bicihanîna wezîfeya parêzeran re eleqedar dibe.
Parêzeran di serlêdanê de şert û mercên girtina muwekîlên xwe yên li Îmraliyê û pirsgirêkên astengkirina pîşeya hiqûqî ya di çarçoveya belgeyên Neteweyên Yekbûyî de bi awayekî berfireh pêşkêşî raportoran kirin û diyar kirin ku ji bo serlêdanê divê demildest bê nirxandin. Parêzeran bal kişand ser wê yekê ji bo zirarên ku telafiya wê zor in li Îmraliyê ji holê bên rakirin, xwestin bê nirxandin. Parêzeran li ser daxwaza Komîteya Mafên Mirovan a Neteweyên Yekbûyî ya ji bo tedbîrên 6’ê Îlona 2023’yan, diyar kirin ku biryara komîteyê ya mijara gotinê piştgirî dide vê rewşê. Hiqûqnasan diyar kirin ku Tirkiye hê jî daxwazên biryarê pêk neaniye.
BANGA HEWLDANÊ
Parêzeran di serlêdanê de da zanîn ku serdanên parêzeran tên astengkirin û xwestin raportorî ji bo astengiyên li pêşiya parêzeran bên kirin bikevin nava heldanek hevpar.
DAXWAZ HATIN KIRIN
Parêzeran her wiha di serlêdanê de jî ev daxwaz ji raportoriyê kirin:
*Ev serlêdan lezgîn e û divê di demek kin de bê nirxandin.
*Divê dawî li şertên serlêdaran ê incommunicado bê anîn û demildest daxwaza ji bo hevdîtina malbat û parêzeran ji hikumetê re bê ragihandin.
*Divê serdana Girtîgeha Îmraliyê bê kirin û şert û mercên li wir di cih de bê lêkolînkirin û serlêdar karibin rû bi rû hevdîtinê bikin.
*Divê muameleya ku serlêdar pê re rû bi rû dimînin, were raporkirin.
*Divê şertên li Girtîgeha Îmraliyê û serlêdar pê re rû bi rû dimînin were şopandin.
*Divê di encama daneyên bên berhevkirin de daxuyaniya çapemeniyê bê lidarxistin.
