Bi boneya nêzîkbûna cejna Remezanê û 4’ê Nîsanê rojbûna Rêber Apo, Meclisa Malbatên Şehîdan a Tirbespiyê ya kantona Cizîrê li Navenda Şehîd Yekta Herekol a Çand û Hunerê şahiyek lidar xist.
Di şahiyê de hevseroka Meclisa Malbatên Şehîdan a Tirbespiyê Xerma Elî axivî û keda şehîdan a parastina destkeftiyên şoreşê, rizgarkirina herêmê ji terorê, parastina yekitiya xaka Sûriyeyê û belavkirina aştî û aramiyê vegot.
Koma Şehîd Bawer a girêdayî Navenda Çand û Hunerê ya Hêzil û Koma Şehîd Dilgeş stran pêşkêş kirin. Her wiha pêşbirk ji zarokan re hat lidarxistin û zarokên serkeftî hatin xelatkirin.
Di dawiya şahiyê de diyarî li zarokên şehîdan hatin belavkirin.
KOBANÊ
Bi heman armancê Meclisa Malbatên Şehîdan a Kantona Firatê şahiyek ji zarokên şehîdan re lidar xist. Şahî bi amadebûna endamên saziyên Rêveberiya Xweser û malbatên şehîdan pêk hat.
Piştî rêzgirtinê, endamê Meclisa Malbatên Şehîdan a Kantona Firatê Rodîn Mihemed 4’ê Nîsanê li malbatên şehîdan û gel pîroz kir û got: “Em ê her tim fikr û felsefeya Rêber Abdullah Ocalan bişopînin.”
Piştre Koma Hîlala Zêrîn stran û şano pêşkêş kirin. Di dawiyê de diyarî li zarokan hatin belavkirin.
