Hevdîtinên li Îmraliyê ku bi Rêber Apo re destpê kirine, li Şengalê jî bi civaka Êzidî re bi taybet jî bi jinên Êzidî re hêvî û îddiaya azadiyê xurtir kiriye. Jinên Êzidî jî bi pêngava TAJÊ ya ‘Rêber Apo bixwîne û bide xwendin’, ji bo azadiya fîzîkî ya Rêber Apo derbasî qonaxeke nû ya têkoşînê bû. Berdevka TAJÊ Riham Hico derbarê hevdîtinên bi Rêber Apo re, siyaseta dewleta Tirk û têkoşîna ji bo azadiya fîzîkî ya Rêber Apo ji ajansa me re axivî.
Riham Hico diyar kir hevdîtinên ku bi Rêber Apo re li Îmraliyê destpê kirine encama berxwedanê ye û ev nirxandin kir: ‘’Em dikarin van hevdîtinan li ser du xalan binirxînin; ya yekemîn encama berxwedana gel a di çarçoveya pêngava ‘Ji Rêber Apo re azadî, ji pirsgirêka Kurd re çareserî.’ Ev berxwedanake pir bi hêz bû. Dengê ku ji bo Rêber Apo li dinyayê belav bû girîng bû. Rewşenbîr, siyasetmedar, ilimdarên cîhanê li her derê ji bo Rêber Apo ketin nav berxwedanê. Vê yekê zexteke mezin li ser dewleta Tirk çêkir û neçar ma bi Rêbertî re hevdîtin bike. Ya duyemîn, berxwedana gerîlayên azadiyê, berxwedana Rojava û Şengalê jî bû sedem ku dewleta tirk Tengav bibe. Ev berxwedan dewleta Tirk dixe nav qeyranên kûr. Ev bû sebep careke din deriyê Îmraliyê vebe. Bangawaziya Devlet Bahçelî ya ji bo Rêber Apo ne axaftinekî ji rêzê an jixweber bû, ji ber tengaviya dewletê bû. Ev heqîqet e, bê Rêbertî li Rojhilata Navîn çareserî çênabe.’’
Riham Hico destnîşan kir ku îro li Rojhilata Navîn şer û têkoşîn di navbera du projeyan de heye û wiha pêde çû: ‘’Fikir û projeya netewa demokratîk a Rêber Apo ku xwe dispêre pêkvejiyana gelan, li Rojhilata Navîn projeyeke daîmî ye. Ji xwe du projeyên esasî hene; yek ji wan netewa demokratîk e ya din jî netew dewlet e. Ev her du proje îro di nav şer de ne. Berxwedana Rêbertî, berxwedana gel û gerîla rê li ber hevdîtinê vekir. Vê hevdîtinê bi gelê Kurd, dostên wê û gelê Tirkiyê re jî hêviyeke mezin çêkir. Lê dewleta Tirk heya niha gavekî erênî neavêtiye. Bi Rêber Apo re hêza çareseriya pirsgirêkan heye lê xuya ye bi dewleta Tirk re nîne. Eger ev pêvajo neçe serî, wê berpirsyar dewleta Tirk be, hikumet be. Ji xwe dewleta Tirk piştî hevdîtinan, êrîşên li ser Rojavayê Kurdistanê kûrtir kir.’’
‘ARMANCA ME AZADIYA RÊBER APO YE’
Berdevka TAJÊ Riham Hico anî ziman ku pêkhatina hevdîtinên li Îmraliyê nayê wê wateyê ku tecrîd şikiyaye û wiha berdewam kir: ‘’Rast e hevdîtin çêbûye lê hê tiştekî fermî nebûye, heya niha kiryarên dewleta Tirk pêvajoyê ber bi aşitî û çareseriyê ve nabe. Xuya ye ku dewleta Tirk dixwaze Kurdan bêçek bike, Kurdan teslîm bigire. Lê ev ne ji aliyê Rêbertî ve, ne ji aliyê gelê Kurd ve tê qebûlkirin. Pêwîst e pirsgirêka Kurd çareser bibe ku ev pêngav pêş keve. Eger dewleta Tirk êrîşên xwe yên li ser gelê Kurd nede sekinandin zehmet e ku pirsgirêk çareser bibe. Ji ber vê, hevdîtinên ku îro li Îmraliyê pêş dikevin dîrokî ne. Bi rastî jî kîlîta çareseriya Tirkiyeyê û Rojhilata Navîn bi Îmraliyê ve kilîtkirî ye! Eger dewleta Tirk dixwaza pirsgirêkan çareser bike, pêwîst e Rêbertî guhdar bike. Em bi hêvî ne ev pêvajo pêş bikeve û gelên Kurdistanê, gelên Rojhilata Navîn bigihin mafê xwe. Bi çend hevdîtinan tecrîda li ser Rêbertî naşkê, ne ku heya niha tecrîd rabûye. Dewleta Tirk ji ber tengaviya xwe van hevdîtinan kir. Hedefa me ne tenê em agahî derbarê rewşa Rêbertî de bigirin. Armanc ew e ku Rêbertî azad be û karibe vê pêvajoyê rêvebibe.’’
‘PÊWÎST E EM HÛRGÛLIYÊN FELSEFEYA RÊBER APO BIZANIN’
Riham Hico derbarê rojeva jinên Êzidî yên Şengalê û pêngava ku nû dane destpêkirin de jî nirxandin kir û got: ‘’Tu çiqasî fikrê Rêbertî nas bikî tu ewqas dikarî xwe jî, heqîqeta xwe jî nas bikî. Weke gelê Şengalê, bi taybet jî weke jinên Êzidî fikrên Rêbertî di çarçoveya giştî de hate naskirin. Herkes dizane Rêbertî kî ye, Rêbertiyek çawa ye ji bo gelên bindest. Hêzên desthilatdar îro dikarin ji bo berjewendiyên xwe civakan tine bikin, jinan qir bikin. Em berê xwe bidin Xeze, Lubnan, êrîşên li ser Rojava… Lê Rêbertî hemû fikrê xwe xistiye bin xizmeta civakan. Bi fikrê Rêbertî kes bê maf namîne, jin jî pêkhate jî dibin xwedî maf. Herkes li gor rastiya xwe mafê xwe digire. Fikrê Rêbertî di vê çarçoveya giştî de tê zanîn, lê divê em hûrgûliyên felsefeya Rêber Apo jî bizanin.’’
‘ARMANCA PÊNGAVA TAJÊ BELAVKIRINA FIKRÊ RÊBER APO YE’
Riham Hico di nirxandinên xwe de bal kişand ser hêza felsefeya Rêber Apo jî û bandora fikrên wî wiha şîrove kir: ‘’Ji bo em xwe biparêzin û bigihin mafên xwe, pêwîst e em kûrahiya fikrê Rêbertî nas bikin. Bi giştî civaka Êzidî û bi taybet jinên Êzidî, ji bo karibe bigihe mafên xwe pêwîst e em civaka Iraqê bi giştî bi xwe re birêxistin bikin. Ev jî bi belavkirina fikrê Rêbe Apo mimkûn e. Îro li hemû dinyayê jin bi felsefeya ‘Jin, Jiyan, Azadî’ li ser lingan e. Ev jî encama fikrê Rêber Apo ye. Ji ber vê pêwîst e fikrê Rêber Apo baş were belavkirin. Armanca pêngava ku TAJÊ daye destpêkirin jî ev e. Wê ev pêngav bi xwendina parêznameyên Rêber Apo, bi seminer û perwerdehiyan re wê pêşbikeve. Bi taybet jinên Êzidî ji bo azadiya fîzîkî ya Rêber Apo gelek çalakî kirin lê dîsa jî em ê bi xurtkirina vê pêngavê re rexnedana xwe bidin. Amadekariyên baş ji bo vê pêngavê hatine kirin û em bawer in wê encamên wê xuya bibin.’’
‘EM Ê KOMPLOYA NAVNETEWÎ BIŞKÎNIN, RÊBER APO AZAD BIKIN’
Berdevka TAJÊ Riham Hico di dawiya axaftina xwe de jî Komploya Navnetewî ya li dijî Rêber Apo nirxand û wiha axivî: ‘’Rêber Apo, ji navê xwe xuya ye. Hedefa komployê ew bû ku di şexsê Rêber Apo de gelên Rojhilata Navîn werin tinekirin. Piştî komployê destwerdana li Rojhilata Navîn berfireh bû. Ji Iraqê heya Sûriyê hate dagirkirin. Niha hewldan hene ku mudaxele li hin welatên din were kirin. Ji xwe hin dewletên Ereb yekser teslîmî wan bûn. Ev hemû bi komploya navnetewî ve girêdayî ye. Rêber Apo li ber berjewendiyan asteng bû, lewma ev komplo hate lidarxistin. Îro dixwazin Sûriyeyê bikin weke Efganîstanê. Êrîşên li ser Rojava, li ser Şengalê tê meşandin jî bi komployê re girêdayî ne. Ji ber vê, Rêber Apo got an wê çareseriya min pêş bikeve an jî ya Emerîkayê. Ev komplo ne bi tenê li ser gelê Kurd e, li ser gele Ereb e jî, li ser Mesîhiyan e jî, li ser hemû gelên Rojhilata Navîn e. Em bawer dikin bi berxwedana gel em ê vê komployê têk bibin û Rêber Apo azad bikin.’’
