Welatên Ewropayê, piştî bombardûmana Îsraîlê ya li ser Îranê ji bo kêmkirina rageşiyê banga xwe dewam dikin.
Li gorî nûçeya AFP’ê di vê çarçoveyê de Wezîrên Karên Derve yên Elmanya, Fransa û Qraliyeta Yekbûyî wê roja Înê li Cenevreyê bi hempîşeyê xwe yê Îranî re hevdîtinê bikin. Hate ragihandin ku şefa dîplomasiyê ya Yekîtiya Ewropayê Kaja Kallas jî wê tevlî hevdîtinê bibe.
Îsraîlê 13’ê Hezîranê êrîşeke giran bir ser Îranê û li sedan navendên nukleerî û leşkerî xist, efserên payebilind û zanyarên nukleerî kuşt.
Spekulasyon zêde dibin ku Dewletên Yekbûyî yên Emerîkayê (DYE) wê yekser tevlî vî şerî bibe. Donald Trump anî ziman ku ew destwedana leşkerî ya li bernameya nukleerî ya Tehranê nadin aliyekî.
Di daxuyaniya Yekîtiya Ewropayê ya roja Şemiyê de hate gotin, “Her tim bi rengekî eşkere hate gotin ku divê destûr neyê dayin ku Îran bibe xwedî çeka nukleerî.”
Kaja Kallas got, ji bo Tehran nebe xwedî bombeya atomê divê rêya dîplomasiyê bê tercîhkirin.
