Konseya Giştî ya Tevgera Şoreşê ya Yekbûyî ya Jinan (KBDH) bi wesîleya 8’ê Adarê Roja Jinan a Cîhanê daxuyaniyek da.
Di daxuyaniyê de hate ragihandin ku îradeya jinê ya ku di sedsala 20’î de 8’ê Adarê û şoreş afirand, di sedsala 21’ê de bi feraseta ‘her roj 8’ê Adarê’ têkoşîna zayendî ya hîn xurt kiriye û bi îdîaya ‘Şoreşa Jinê’ dewam dike. Di daxuyaniyê de hate gotin, “Şoreşa jinê ya ku sala 2012’an li Rojava hate ragihandin û berxwedana heta roja îro dewam dike, di asta herêmî de derfetên nû yên şoreşên jinê diafirînin, li dijî tarîtiya serweriya mêr û faşîzmê dibin ronahî û rê nîşan didin. Serhildana jinê ya li Îran/Rojhilat li ser vê bingehê ji xwe re rêyek peyda kir û bi hêvî dimeşe. Şoreş hem di asta herêmî hem jî di asta navneteweyî de dewam dike.
Têkoşîna me ya azadiya jinê ya li Tirkiye û Kurdistanê di rewşeke welê de dest bi 8’ê Adarê dike ku qeyûm li 12 şaredariyan hate danîn, li ser Rojava û Herêmên Parastinê yên Medyayê êrîşên nû yên dagirkeriyê têne kirin, polîtîkayên qirkirina Kurdan tê kûrkirin, karê bi koletiyê li karkerên jin têne ferzkirin, maf têne desteserkirin, xizanî li jinên kedkar rewa tê dîtin, êşkenceya birçîbûn û xizaniyê dewam dike, pêşengên jin ên şoreşger û berxwedêr têne qetilkirin.”
Di dewama daxuyaniyê de hate destnîşankirin ku di demeke bi vî rengî de parastina Şoreşa Jinê ya Rojava li eniya Tişrînê li hemberî êrîşên dewleta Tirk û çeteyên wê 2 meh in berxwedaneke dîrokî dike û hate gotin, “Rojava bi gel û şervanên xwe ji bo avakirina Sûriye û Rojhilata Navîn a demokratîk berdêlên giran dide û ji şoreşa Tirkiye û Kurdistanê re jî dibe çavkaniya sûdwergirtinê. Di serî de berxwedana li Bendava Tişrînê em hemû jinên ku di parastina şoreşa Rojava de tevlî karwanê nemiran bûn, bi hurmet bi bîr tînin.”
Konseya Giştî ya KBDH’ê diyar kir ku tevgera azadiyê ya jinên Kurd niha li Kurdistanê û Tirkiyeyê ji bo aştiyeke bi rûmet û bidestxistina destketiyên siyasî têkoşîneke mezin dimeşîne û destnîşan kir ku dem ew e ku bi tevgera azadiyê ya jinên Kurd re têkoşîneke hîn xurt a yekbûyî bê meşandin.
Di dewama daxuyaniyê de hate gotin, “Pêkanîna şert û mercên jiyan û kar ê azad ê hevrê Ocalan ku tevkariyên girîng li têkoşîna azadiyê ya jinê kiriye, li dijî şovenîzma sosyal, faşîzm û serweriya mêr, ji bo avêtina gavên pratîkî yên têkoşîna azadiyê ya siyasî gelekî girîng e. Ji bo xwişk û biratiya gelan, ji bo çareseriya demokratîk a pirsgirêka Kurd dem ne dema gotinê ye, dema çalakiyê ye. Ji 8’ê Adarê heta bi Newrozê têkoşîna yekbûyî ya jinan divê li dijî şovenîzma civakî bibe dengê xurt ê aştiya wekhev.”
Daxuyaniya KBDH’ê bi vê bangê bi dawî bû:
“Weke KBDH em bang li jinan hemûyan dikin ku di 8’ê Adarê de ji bo azadî û wekheviyê têkoşîna jinê ya li dijî faşîzmê bi hev re mezin bikin. Li dijî kuştina jinan, li hemberî tundiya zayendî, li hemberî dagirkerî û şer em berxwedana jinê bilind bikin. Li hemberî zayendîperestî, neteweperestî, şovenîzm û êrîşên li ser hebûna me, em xwe bi rêxistin bikin, şer bikin. Têkoşîna me têkoşîna ji bo avakirina cîhaneke wekhev û azad e. Sedsala 21’ê wê ji bo şoreşa jinê ya bi coş dewam dike, bibe sedsala serketinê. Berxwedan wê mezin bibe, em ê bi ser bikevin.”
