- Şehîd Hozan Mizgîn, hozana têkoşîna gelê xwe xwedî hilbijardin û helwêstê bû. Di heman demê de xwedî xîretê jî. Di pêvajoyên herî dijwar, ji agir û sotîner de bi derketina xwe ya rêya azadiyê, bi serê xwe di wateya şoreşê de bû.
Hozan Mizgîn
Di nivîsa hefteya borî de, bi xetên giştî hewildana serencama herî bedew a hunerê weke serdêr derketin pêş. Herî dawî jî bi hevoka; ‘Kesê avakarê hunerê jî, mijara nivîsa hefteya bê ye’ qediya bû. Ji ber ku ev serpêhatiya herî bedew, bêyî avakar, kirde û xwediyên vê serpêhatiyê, ne gengaze ku pêk were. Huner bi hunermend xwedî xeyal, bedewî, lihevhatî û ji dem û mekan derbas dike. Hunermend li ser vê serpêhatiyê zêde dike û ferqa xwe ya binyadî ya dîtin û xuliqdariyê pêk tîne. Hunermend xwedî rêwîtiyeke herî cuda û xwirt e. Rêwitiyeke ku wate li jiyanê bar dike.
Ji ber vê ye ku hunermend, di her dem û cîh de xwedî gotineke xwe ya sînornenas e. Nasnameya hunermend raserî tevahî nasnameya ye. Ji ber ku hunermendî bi xuliqdariyê hatiye xelatkirin. Loma xwedî gotina herî bandorkere û herî watedare. Xwedî hilbijardinekê ye û li gorî wê jî bi helwêst, nêzî dilê mirovan dibe. Hilbijarde û helwêsta hunermend, vê serpêhatiya herî bedew dixemilîne. Helbet her hilbijarde li gorî xwe, bi rengê xwe û bi zimanê xwe ye. Hilbijardeyên li gorî jiyan, civak, exlaq, wicdan û hêviyê jî hene, her wiha hilbijardeyên li gorî serdest, dij jiyan û civakê jî hene. Ev hilbijarde zelal, xwerû û diyarkere. Rastiyeke wisa ku bê hilbijarde mayîn nîne, ev yek jî di xizmeta aliyekê de ye ji ber ku. Hunermend bi qasî hilbijardina xwe ya nêzî heqîqetê û wateyê bi hêz e, bi Xwebûne û diyarkerê çarenûsê ye.
Mînaka herî bedew a vê rastiyê, di kesayetên gelek hunermendên ku di têkoşîna gelê Kurd a azadîxwaz de xwe nîşan dide. Rêbaza hunerê ji serî ve rêbaza herî diyar û bandorker bû. Û hunermendên vê rêbazê her tim xwedî hilbijardin û helwêstê bûn. Pêşengê vê yekê jî Şehîd Hozan Mizgîn e. Hozana têkoşîna gelê xwe xwedî hilbijardin û helwêstê bû. Di heman demê de xwedî xîretê jî. Di pêvajoyên herî dijwar, ji agir û sotîner de bi derketina xwe ya rêya azadiyê, bi serê xwe di wateya şoreşê de bû. Perwerdeyên hebûnî yên hişmendî û leşkerî wate li ser wateyê bar dikir. Lê rêwitiyeke din a vê têkoşîna bêhempa de Hozan Mizgîn bi hunera ku rê û aso ji azadiyê re vedikir pêk anî. Xîreta azadiyê di hunera wê de vejîneke nû bi xwe re dianî. Ew jina çeleng a yekeman bû. Ji gundê xwe derket û berê xwe da welatê xwe yê qedîm, ji welatê xwe jî bere xwe da Ewrûpayê û li wir bi deng û evîna xwe di navbera welêt û Ewrûpa de bû pirdeke herî qewî ya hezkirin û hêviyê. Bi stranên wê hawara xwe gihande gundiyên welêt, li qeraxa Çemê Hêzil êşa hevalên xwe niqûtand tevahî dilên Kurdistaniyan, qada Newrozan bi strana xwe kir qada berxwedanê û gelek wateyên din jî. Bi jinan re hêz û hebûna jinê ava kir. Dema pêwist kir, bê fikar û guman li qadên herî dijwar ên şer de di asta herî bilind de şervantî û fermandariyê pêk anî. Heta roja 11ê Gulana sala 1993 ku tevlî karwanên nemirên welêt bû, ji kirina ya pêwist xwe neda alî.
Bû remza hilbijardin, helwêst û xîreta hunermendên li ser rêya azadî, heqîqet û bedewiyê. Ji ber wê roja 11ê Gulanê weke roja tevahî şehîdên çand û hunerê tê bibîranîn. Di kesayeta Şehîd Mizgîn de bibîranîna tevahî hunermendên ax û jiyan û civaka bi rûmet bibîr tînin. Serpêhatiya wan a herî bedew dîroka me ya hunermendane ye. Ji bo hunermendan pîvana hilbijardin, helwêst û xîretê ne.
