Hate ragihandin ku li herêma Cammu û Keşmîrê ji ber barana zêde lehî rabû û hezaz çêbû. Di encamê herî kêm 30 kesan jiyana xwe ji dest dan.
Rayedarên herêmî diyar kirin ku piraniya qurbaniyan, dema ku ber bi perestgeha Hindû ya Vaishno Devi ve diçû di bin avê de ma.
Li gorî zanyaran, di demsala barana mûsonê (Hezîran-Îlon) de karesatên bi vî rengî gelekî tên dîtin û ev yek ji ber guherîna avhewayê û bê plansaziya binesaziyê rê li ber karesatên wêranker vedike.
Piştî barana dijwar a roja Sêşemê, ava çeman bilind bû û gelek mal bin avê de man. Nûnerê hikûmeta federal a herêmê Manoj Sinha ragihand ku zêdetirî 5,000 kes hatine tehliyekirin û artêş jî beşdarî xebatên alîkariyê dibe. Her wiha xebatên ji bo gihandina pêdiviyên lezgînî didomin.
Ji ber karesatê dibistanên li herêmê hatin girtin, ji ber qutbûna binesaziya ragihandinê xebatên rizgarkirinê giran dimeşin. Çemê sereke Jhelum ê Cammu Keşmîrê yê li paytext Srinagarê ye asta hişyariyê derbas kiriye.
Serokwezîr Narendra Modi ji ber mirina mirovan “xemgîniya xwe” anî ziman.
Li herêmê di nava vê mehê de karesata duyemîn rû dide. Li gundê Chisotiyê di lehiyê û erdhejên ji ber barana zêde ya 14’ê Tebaxê de herî kêm 65 kes jiyana xwe ji dest dan û bi dehan kes jî winda bibûn.
Tê payîn ku li bajarê Dharali yê li eyaleta Uttarakhandê ji ber hezaza ku di 5’ê Tebaxê de qewimîbû zêdetirî 70 kesan jiyana xwe ji dest dabûn.
