Ji endamên Fermandariya Biryargeha Navendî ya YJA Starê Emîn Erciyes (Nazli Taşpinar) di encama êrîşên dewleta Tirk de 20’ê Nîsana 2020’î li herêma Garê şehîd bû.
Hevrêya wê Rengîn Botan qala têkoşîn û berxwedana Emîne Erciyes a bi salan a li nava Tevgera Azadiyê ya Kurd kir. Rengîn Botan anî ziman ku şehîd Emîne Erciyes ji qada Tirkiyeyê tevlî bû û got, “Beriya her tiştî hevala Emîne bi hurmet û minet bi bîr tînim. Di şexsê hevala Emîne de şehîdên şoreşê hemûyan bi bîr tînim, bi rêzdarî bejna xwe li ber bîranîn, ked û fedakariya wan ditewînim.
Vegotina hevala Emîne gelekî zehmet e. Min piştî salên 2000’î hevala Emîne nas kir. Hevaleke germ û bi kelecan bû, ji ber vê yekê li cihê ku lê bû yekser bal dikişand. Hevaleke Tirk bû ku ji qada Tirkiyeyê tevlî bûbû. Ji ber ku hevaleke xwedî lêgerînan bû, di salên 1990’î de tevger nas kir û di salên 1996-1997’an de tevlî nava têkoşînê bû.
Hevala Emîne bi jiyan, tevlîbûn, coş, kelecan û moralê xwe dihate naskirin. Xwedî taybetmendiyên Anatoliya Navîn bû ku ji wê herêmê hatibû. Zû xwe dida hezkirin, hevaltiyek bi dil û can dikir. Ji xwe hevrêtiya wê gelekî xurt bû. Jineke hem şoreşger hem jî têkoşer bû. Lêgerînên xwe yên azadiyê gelekî zêde bûn. Bi zanebûn tevlî nava jiyanê û têkoşînê dibû. Weke hunermendekê nêzî têkoşîna azadiyê dibû. Ji xwe yek ji taybetmendiyên wê yên sereke jî hunermendiya wê bû. Mînak, dem dihat dibû helbestvan, dem dihat dibû nivîskar, dem dihat dibû wêjevan.
Hevaleke hunermend, şanoger bû. Yeka gelekî têgihiştî bû, ti carî ji rêzê nêzî jiyanê nedibû. Bi rengekî ji rêzê nêzî bûyeran, pirsgirêkan, jiyanê, şer, têkoşînê nedibû. Ji ber ku nêzîkatiyeke îdeolojîk nîşan dida. Bi pîvan bû, bi wî rengî tevdigeriya. Di nava vê têkoşînê de salên dûr û dirêj têkoşiya. Ji ber ku dilsoziya wê ya bi Rêber Apo re gelekî xurt bû. Ji xwe li gel Rêbertî jî mabû. Gelek taybetmendiyên xwe ji qada Rêbertî wergirtibû. Mînak hezkirina wê ya hevrêtiyê, têkiliya wê ya kûr a bi hevrêyan re, diyar bû ku ji hevrêtiya xwe ya bi Rêber Apo wergirtibû. Dixwest dilsoziya xwe ya bi Rêber Apo re di nava jiyanê de jî bi rengekî rast temsîl bike. Ji hevrêtiya Rêber Apo gelek tişt wergirtibû. Ji ber vê yekê di nava jiyanê de çêker û komunal bû. Hevala Emîne ne hevaleke welê bû ku tenê li xwe difikirî, taybetmendiyên bi vî rengî pê re tine bûn. Hevrêtiya xwe ya têkoşînê, ruhê komunal ji hevrêtiya bi Rêber Apo re wergirtibû. Lewma dixwest hevrêtiya ji Rêbertî hîn bûye di nava jiyanê de bi hevrêyên xwe re parve bike. Her tim dixwest Rêbertî bişopîne û hêjayî wî be.”
DI SERÎ DE ZAGROS, BEHDÎNAN LI GELEK HERÊMAN WEZÎFE KIR
Rengîn Botan işaret têkoşeriya şehîd Emîne kir û got, “Hevala Emîne gelekî bi tevger, bi dîsîplîn bû. Jİ xwe ji ber vê yekê di demeke kurt de wezîfeyên gelekî girîng, rol û mîsyon bi cih anî. Li qada leşkerî gihîşt asta fermandariyê. Salên dûr û dirêj di nava YJA Star û HPG’ê de di asta fermandariyê de bi roleke çalak rabû. Demeke dirêj li biryargehê ma. Di serî de Zagros û Behdînan hema bibêje li hemû qadan weke fermandarekê bi cidî kar meşand. Bi taybetî li Zagrosan fermandarî ne hêsan e, ne karekî ji rêzê ye. Lê belê hevala Emîne xwe jê re baş amade kiribû, lewma dikarîbû li qadeke weke Zagrosan fermandariyê bike. Di şer de gelekî wêrek bû, gelekî fedakar û fedaî bû. Di nava şervanan de jî ev ruhê fedaî diafirand.
Ji xwe şervanên li gel wê zû û bi xurtî tevlî têkoşînê û şer dibûn. Ji ber ku hevala Emîne gelekî bi şervanan re eleqedar dibû. Ne tenê fermandarî ji şervanan re dikir, belê aliyê wê yê fermandariyê gelekî xurt bû, lê mînak heval bi rêxistin dikir, perwere dikir. Hevala Emîne di nava Têkoşîna Azadiyê ya Kurdistanê de gelek şervan perwerde kir, kedeke mezin da şervanan. Jiyan, şer, têkoşîn, taybetmendiyên jiyanê hînî wan dikir. Qalê dikir bê xweparastin çiqasî girîng e. Ji ber van taybetmendiyên xwe heval gelekî bi dilxwazî tevlî perwerdeyên hevala Emîne dibûn. Dixwestin bi hevala Emîne re tevlî karên pratîkê bibin, bi wê re şer bikin û tevlî perwerdeyên wê bibin. Hem xwe perwerde dikir, hem jî hevrêyên xwe perwerde dikir. Di perwerdeyê de kedeke mezin dida. Ji her kesî re qala taybetmendiyên jin a azad, mêr ê azad dikir. Hevala Emîne yeka entelektuel, xwedî tecrûbe, zane, bi kûrahiya îdeolojîk bû.”
KEDKARIYA WÊ GELEKÎ XURT BÛ
Rengîn Botan destnîşan kir ku şehîd Emîne Erciyes ji ber ku ji malbateke kedkar bû di temenekî gelekî ciwan de bi berpirsyarî rabû û di dawiya axaftina xwe de got, “Hevala Emîne di nava tevgerê de, li her qada jiyanê bi taybetmendiyên xwe yên kedkariyê li pêş bû, ev taybetmendiyên wê gelekî xurt bûn. Nediwestiya, timî weke ku divê bigihêje cihekî, weke ku di maratonê de ye tevdigeriya. Timî dixwest bigihêje armancên ji xwe re diyar kiriye. Her tim armancên mezin datanî pêşiya xwe. Ti carî bi rengekî rûtîn tevnedigeriya. Cihê hevala Emîne di nava têkoşîna me de gelekî diyar e. Li nava tevgera jinê, li nava tevgera giştî şopeke mayinde hişt.
Bêguman şehadeta hevrêyên weke hevala Emîne ji bo têkoşîna me cihê rûmetê ye, serbilindiyê ye û berê me dide armancên hîn mezin. Dike ku em hîn bi xurtî xwedî li wezîfe û berpirsyariyên xwe derkevin. Bêguman cihê şehîdên weke hevala Emîne zû bi zû nayê dagirtin. Hevrê Emîne li nava têkoşîna me xwedî cihekî bi vî rengî bû. Em tevahiya hêza xwe seferber bikin jî nikarin valahiya hevalên weke hevala Emîne dagirin. Nebûna wan gelekî diyar e. Divê em hêjayî şehîdên weke hevala Emîne bibin. L iser vê bingehê hevala Emîne careke din bi hurmet û minet bi bîr tînim. Soza xwe dubare dikim ku em ê têkoşîna wan ji cihê hiştine bi ser bixînin. Ji bo karibin erk û berpirsyariyên xwe bi cih bînin, em ê hêza xwe bi temamî seferber bikin, ku karibin hêjayî şehîdên xwe yên weke hevala Emîne bibin. Tenê bi vî rengî em dikarin doza hevala Emîne bi ser bixînin.”
