Binpêkirinên mafan ên li girtîgehan bi awayekî sîstematîk berdewam dikin. Bi taybetî jî girtiyên li Girtîgeha Ewlehiya Bilind a Dûmlûyê ya Erziromê bi tecrîda giran û îzolasyonê re rû bi rû dimînin.
Endamê Komeleya Hiqûqnasên Azadîxwaz (OHD) Parêzer Necat Çîçek diyar kir ku tevî hemû serlêdan û daxwazêm petdakirina çareseriyê jî tu guhertin çênebûye, anî ziman ku li girtîgehê hem binpêkirinên mafan ên derûnî hem jî yên fîzîkî berdewam dikin û bang li rayedaran kir ku tavilê ev yek werin çareserkirin.
‘NIKARIN HEVÛDU BIBÎNIN Û BIAXIVIN’
Parêzer Necat Çîçek diyar kir ku li Girtîgeha Hejmar 2 a Dûmlûyê tabloyeke giran heye û got: ‘’Girtî bes dikarin li gel kesên di heman blokê de dimînin biaxivin. Li vir di navbera girtiyan de tecrîd û îzolasyoneke cidî heye. Li gel blokên din tu têkilya wan tune ye û di sewqkirina nexweşxaneyê de jî temasa di navbera blokan de tê astengkirin. Girtiyan li hemberî van pirsgirêkan çalakî dan destpêkirin; di destpêkê de dest bi çalakiya derneketina hewastandinê û piştre jî dest bi çalakiya nannestandinê kirin.’’
‘BI SALAN E NAŞÎNIN NEXWEŞXANEYÊ’
Necat Çîçek di dewama axaftina xwe de da zanîn ku piştî greva birçîbûnê ya girtiyan li dijî van pirsgirêkan dan destpêkirin jî tu pêngavên çareseriyê nehatine avêtin û ev yek anîn ziman: ‘’Li girtîgehan girtiyên nexweş naşînin nexweşxaneyê. Girtiyên ku ev sê sal in ji bo tedawiya diranî disekinin, hene. Girtiyên ku divê dermanan bistînin yan jî êşa wan heye, ev demeke dirêj e li benda sewqkirinê ne. Yan piştî mehan diçin yan jî qet nikarin biçin. Hin girtî di qatên herî jêr de tên ragirtin û hema bibêjin bi tu awayîçavê rojê nabînin. Her çend derkevin hewastandinê jî ji ber dîwarên bilind rojê nabînin. Ev yek rê li ber nexweşiyan vedike.’’
‘DERHEQÊ GIRTIYÊN PAQIJÎ KIRINE DE LÊPIRSÎN HATIYE VEKIRIN’
Necat Çîçek piştre anî ziman ku malzemeyên paqijiyê nadin girtiyan, girtî bi derfetên xwe peyda dikin û got: ‘’Ji ber ku girtiyan paqijî kiriye derheqê wan de lêpirsîn hatiye vekirin. Ev lêpirsîn bi neşopandinê bi encam bû; lê belê li girtîgehan paqijiya bi ava cilan jî weke sûc tê qebûlkirin. Ji ber vê yekê li girtîgehan pirsgirêkên hîjyenê yên cidî hene. Her wiha di saetên hevdîtina bi malbatê re pirsgirêk û astengiyên cidî hene.’’
‘GEF LI GIRTIYAN TÊN XWARIN’
Parêzer Necat Çîçek piştre destnîşan kir ku gef li girtiyan tên xwarin û ev yek anîn ziman: ‘’Dema ku daxwaza çareseriya van pirsgirêkan tê kirin jî girtî li şûna hevdîtinê bi gefan re rû bi rû dimînin. Polîtîkaya ku tê sepandin tecrîda fîzîkî û derûnî di nava xwe de dihewîne. Têliya girtiyan bi temamî hatiye qutkirin. Tevî hemû serlêdanan jî rayedaran tu pêngavên şênber neavêtine. Pirsgirêk hê jî berdewam dikin.’’
‘TU AKTÎVÎTEYÊN GIRTIYAN TUNE NE’
Îzzet Gokalp ê bavê Cîhan Gokalp ê ku li Girtîgeha Hejmar 2 a Dûmlûyê tê ragirtin axivî û têkildarî hevdîtina dawîn a bi rêya telefonê bi ajansa me re axivî. Îzzet Gokalp jî anî ziman ku pirsgirêkên ku bi mehan e tên jiyîn hê jî nehatine çareserkirin û diyar kir ku ne name û ne jî cil û bergên ku dişînin, digihîjin girtiyan.
Îzzet Gokalp têkildarî pirsgirêkên li girtîgeha berbehs ev yek anîn ziman: ‘’Li girtîgehê pirsgirêkên gelekî mezin hene. Girtî ne dikarin bi hev re biaxivin ne jî werin ba hevûdu. Pirsgirêkên heyî bi awayî nayên çareserkirin. Me ji kurê xwe re stûmalek şand lê belê bi hinceta ku ew ‘fireh e’ dubare vegerandin. Dema hewastandinê saetek û nîv e û tu aktîvîteyên girtiyan tune ne. Ne dikarin çavê rojê bibîbin ne jî hewayê bistînin. Li hemberî van zextan seredanên piştevaniyê werin zêdekirin û guh bidin daxwazên girtiyan.’’
