Li navçeya Cizîrê ya Şirnexê, 12’emîn Festîvala Çand, Huner û Ziman a Cizîrê ku ji aliyê Şaredariya Cizîrê û Komeleya Ziman û Çandê ya Birca Belek ve tê organîzekirin, dest pê kir. Festîvala ku dê sê rojan berdewam bike, li qada Rezê Mîra ya ku Kela dîrokî ya Birca Belek lê ye, tê lidarxistin. Gelek rêxistinên sivîl, nûnerên partiyên siyasî û bi sedan kes tevlî festîvalê bûn. Destpêka festîvalê, di çarçoveya 15’ê Gulana Cejna Zimanê Kurdî de, bi pêşengiya komeleyên ziman ên Şirnexê bi meş û daxuyaniyeke çapemeniyê hate kirin. Her wiha li qada festîvalê lîstika sobekariyê jî hate pêşkêşkirin.
PANELA ‘ZIMAN, WÊJE Û PSÎKOLOJIYA CIVAKÊ’
Di çarçoveya festîvalê de panelek bi sernavê “Ziman, wêje û psîkolojiya civakê” hate lidarxistin. Moderatoriya panelê ji aliyê endamê Şaxa Komeleya Hiqûqnasên ji bo Azadiyê (OHD) ya Şirnexê parêzer Cihad İnanç ve hate kirin û rêvebira Komeleya Ziman û Çandê ya Cûdiyê Evin Kulja û nivîskar Faysel Ozdemir wekî axivêr beşdar bûn. Faysel Ozdemir diyar kir ku ziman bingeha jiyana civakî ye û got, “Bêyî ziman, wêje, huner û psîkolojî nabe. Heke ziman nebe, em jî nabin. Wêje li ser civakê roleke pir mezin dileyize.” Panel bi beşa pirs û bersivan bi dawî bû.
DENGBÊJAN STRANÊN XWE JI BO AŞTÎYÊ STRAN
Di festîvalê de fîlmê kurt ê bi navê “Navnîşan” ê ku di sala 2022’yan de ji aliyê derhêner Aram Dildar ve hatibû çêkirin, hate nîşandan. Fîlm behsa çîroka mamosteyekî dike ku ji ber navên gundan ên hatine tirkîkirin, nikare bigihîje cihê erka xwe. Roja yekem a festîvalê bi dîwana dengbêjan bi dawî bû. Di dîwana ku li qada Rezê Mîra hate avakirin de, dengbêj Lavînya, Îpek Tok, Hecî Ehmedê Şilyanî, Mihamedê Batî û Xelîlê Serigî, klamên herêma Botanê pêşkêş kirin. Her wiha di festîvalê de bang hate kirin ku her kes beşdarî meşa ku dê sibê li Taxa Cûdiyê bi dirûşma “Gavek ji bo Aştiyê” bê lidarxistin, bibe.
FESTÎVAL DÊ BIDOME
Di roja duyem a festîvalê de li Salona Konferansê ya Şaredariya Cizîrê pêşbirka agahiyê ya di warê çand û zanistê de dê bê li dar xistin. Li Parka Botaşê ji bo zarokan atolye dê bêne çêkirin. Bername dê bi konsera Koma Dengê Botan û hunermend Yusuf Oguz berdewam bike. Di roja dawî ya festîvalê de şanoya yekkesî ya hunermend Ayhan Erkmen a bi navê “Hawar” dê bê nîşandan. Piştî çalakî û atolyeyên zarokan, festîval dê bi konsera Koma Stêrkên Cûdî û hunermend Rojhat Cizîrî bi dawî bibe.
