Berdana girtiyê 31 salan Aydin Altig ê li Girtîgeha Ewlekariya Bilind a Kirşehîrê tê ragirtin, ji aliyê Desteya Îdare û Çavdêriyê ve cara duyem ji bo 6 mehan hate taloqkirin.
Xwişka Altig, Aynur Ozdemîr diyar kir ku dema wan amadekariya tehliyeyê dikir, biryara taloqkirinê zanîn û ragihand ku desteyê ji Altig pirsiye ku fikrên wî hatine guhertin yan na, Altig jî ev bersiv daye: “Eger di 31 salan de nehatibe guhertin, di 6 mehan de jî nayê guhertin.”
Ozdemîr diyar kir ku tehliyeya wî bi hinceta “poşmantî nîşan nedaye” hatiye taloqkirin û got, ew ê li dijî biryara Desteya Îdare û Çavdêriyê serî li rêyên hiqûqî bidin.
Tehliyeya Aydin Altig ê ku dema 17 salî hat binçavkirin û cezayê hepsê yê heta hetayê lê hat birîn, berê jî bi heman hincetê taloqî 6 mehan hatibû kirin. Bi biryara duh re tehliyeya wî cara duyem ji bo 6 mehan hate taloqkirin.
