Berdevka Navenda Ragihandinê ya Yekîneyên Parastina Jin (YPJ) Rûken Cemal îro daxuyaniyek da malpera YPJ‘ê. Rûken Cemal diyar kir ku di çarçoveya peymana 29 Çileya 2026’an de weke YPJ‘ê dan û standinên wan bi Şamê re dewam dikin.
Rûken Cemal bi bîr xist ku di meha Nîsanê de hevdîtin bi wezîrê parastinê yê hikumeta veguhêz Murhaf Ebû Qasra re pêk anîbû û got: “Me pêşnûmeyeke ji nêrîn û pêşniyarên xwe bi awayekî nivîskî pêşkêş kiribû. Heya niha ti pêşniyar an jî biryareke fermî ji aliyê rayedarên Şamê ji me re nehatiye ragihandin.”
Rûken Cemal destnîşan kir ku nêrîn hene ku YPJ‘ê wek hêzeke xweser a dijterorê di nava wezareta hundirîn de cih bigre, lê belê heya vê kêliyê ew negihane biryareke zelal.
Berdevka Navenda Ragihandinê ya YPJ‘ê anî ziman ku di rojên pêş de dê ji bo goftûgokirina vê mijarê wê hevdîtinên wan li gel rayedarên Şamê pêk werin û ev peyam da: “Heya ku em mîrateya YPJ‘ê bixin bin ewlehî û misogeriyeke qanûnî wê têkoşîn û xebatên me dewam bikin.”
