Li Rihayê, Meclisa Jinan a Partiya Wekhevî û Demokrasiyê ya Gelan (DEM Partî) di çarçoveya “Civînên jinan di avakirina civaka aştiyane û demokratîk de” de li Wêranşarê bi jinên Êzidî re hat cem hev. Gelek jinên Êzidî tevli civîna ku li taxa Burçê ya navçeyê hat lidarxistin bûn. Di civînê de li ser rola jinan a di nava pêvajoyê de nîqaş hatin kirin.
Hevberdevka Komîsyona Ziman, Çand û Hunerê ya DEM Partiyê Cemîle Turhalli ya ku di civînê de axivî, bal kişand ser komkujiyên ku civaka Êzidî di pêvajoya dîrokî de jiyaye û ev tişt got: “Êzidî di aliyê dîrokî û baweriyê de civakeke gelekî taybet in. Di pêvajoya hezar salan de nasname û baweriya xwe parastin. Tevî hemû komkujiyan li ser piyan man.”
Cemîle Turhalliyê anî ziman ku ji bo gelê Kurd bi hemû ferq û cudahiyên xwe bên cem hev li ser rê û rêbazan nîqaşan dikin û bal kişand ser girîngiya rêxistinbûnê ya ji bo yekitiyê û got: “Bêyî Êzidiyan civaka demokratîk nabe. Ji bo ku ev pêvajo pêş bikeve divê Êzidî cihê xwe bigirin.”
‘JI BO DERKETINA APO EZ ŞEV Û ROJ DUA DIKIM’
Piştî axaftinan jinên Êzidî daxwazên xwe anîn ziman. Jinekê Êzidî got: “Bila Êzidî tim hebin. Ji Xwedê re şikir gelê Kurd jî li pişt me ye. Kurd li pişt me ne. Li Şengalê xwedî li me derketin. Jinên me ji DAIŞ’ê xilas kirin. Baweriya me baweriyeke paqij e. Ji Êzidiyan xerabî nayê. 74 ferman bûn lê me tu carî ola xwe neguhert. Em dixwazin aştî çêbibe. Êdî bila Apo jî derkeve. Em dixwazin gelê xwe carekê bibîne. Em şev û roj duayê dikin ku Apo derkeve. Em dixwazin bibîne ku ka çi serkeftin bi dest xistiye.”
‘EM SERÎ NATEWÎNIN’
Jineke din a Êzidî ku xwest jinên din ên ku li Şengalê dîl ketine jî werin rizgarkirin, diyar kir ku serdest dixwazin Êzidî di bin destilatdariyê de bimînin û got: “Em qet serî li ber wan netewînin. Êdî bila aştî çêbibe. Bila mafên me jî werin dayin.”
‘DIVÊ KURD LI HEMBERÎ HEV DURIST BIN’
Dayikekê Êzidî anî ziman ku ew tim bi fermanan re rûbirû mane û wiha axivî: “Em dixwazin di serî de Apo her kes ji girtîgehê serbest bê berdane. Heke Kurd li hemberî hev durust bûna heta niha dê dewleta wan hebûna. Ji bo vê yekê divê em li hemberî hev durist bin.”
Jineke din a Êzidî diyar kir ku ji ber zewacê ji Nisêbînê hatiye vê taxê û got ku ji ber fikarên ewlehiyê neçar ma ku piştî lîseyê perwerdehiya xwe biterikîne. Jina ciwan anî ziman ku ew êdî dixwazin di şert û mercên rehet û ewle de bijîn û xwest ku bi lez û bez aştî pêk were.
Civîn piştî axaftinan bi çepikan bi dawî bû.
