Serokê Giştî yê MHP’ê Devlet Bahçelî, li Meclisê di civîna heftane ya koma partiya xwe de axivî û bûyerên di rojevê de nirxand. Bahçelî işaret bi Pêvajoya Aştî û Civaka Demokratîk kir û got: “Xebatên komîsyona Meclisê, bi piştevaniya partiyên siyasî yên cuda, bi rapor, muzakere û amadekariyên verastkirinên qanûnî bi pêş dikeve û ev gelek watedar e. Di vê mijarê de komîsyonê peywireke dîrokî li xwe girtiye. Niha di dorê de verastkirinên siyasî û hiqûqî hene. Wê lez bidin xebatên qanûnên pêwîst, pêşniyar bên nirxandin û ji her partiyê pêşniyar bên girtin. Qanûnkirina van pêşniyar wê bi îradeya gel bibe. Divê kesek gotinên zirarê didin biratiya me neke.”
Di dewama axaftina xwe de Bahçelî bal kişand ser statuya Rêber Apo û wiha dirêjî da axaftina xwe: “Di 11’ê Tîrmeha 2025’an de bi merasîmekê sembolîk çek hatin berdan û ev jî ji bo bersivdayîna vê banga dîrokî qonaxeke girîng bû. Ev merasîm, bi tena serê xwe encameke tekez nîne. Wê pêvajo were domandin. Di vê çarçoveyê de meseleya statuya Abdullah Ocalan ji hêla me ve girîng e. Ji bo pêvajo bitendurist bidome, mimkûn nîne ku ev meseleye jinedîtî ve were. Eger em bixwazin pêvajo bimeşe, eger em bixwazin banga me diyarker be, di vê pêvajoya ku rêxistin bi hemû hêmayên xwe fesix bibe û çekên xwe teslîm bike; divê ev yek di çarçoveya rêgezên hiqûqî, siyasî û wijdanî de bi eşkereyî were nirxandin. Dema mijar bû ewlehî û paşeroja Tirkiyeyê, divê em rê nedin refleksên hestiyar ên jinişka ve, şemateya li ser medyaya dijîtal, şemateya siyasî, tertepêlên muxalefeta bêbingeh û demên nediyar. Eger di mijara statuya Abdullah Ocalan de valahî hebe, divê ev valahî bi awayekî xizmetê ji Komara Tirkiyeyê re bike were nirxandin. Navê mekanîzmaya di vê mijarê de hewcehî pê heye çi be bila bibe, divê cewhera wê zelal be. Ji bo bidawîkirina van nîqaşan, ez navê Koordînatoriya Pêvajoya Aştiyê û Siyasîbûnê pêşniyar dikim. Bêguman alternatîfên cuda jî dikarin bên pêşniyarkirin. Daxwaza me ew e ku rêbertiya avaker a PKK’ê bi navekî peywira xwe bike.”
