Serokê berê yê KESK’ê Lamî Ozgen têkildarî pêvajoya entegrasyona demokratîk bi ajansa me re axivî. Lamî Ozgen ji ber hem domandina hebûna xwe ya gelê Kurd a bi nasnameya xwe û avaniya xwe ya civakî hem jî pêkvejiyana li gel civaka Tirkiyeyê bal kişand ser entegrasyona demokratîk.
Lamî Ozgen di destpêka axaftina xwe de ev yek anîn ziman: ‘’Dema ku em têkildarî naveroka entegrasyona demokratîk nîqaşan bi rê ve dibin, hemû kes li gorî nêzîkatiya xwe ya siyasî sekn û helwestekê nîşan dide. Baş e weke gel, netew û civakekê ji bo Kurdan entegrasyona demokratîk tê çi wateyê? Herwiha ji ber gelê Kurd bi civaka Tirkiyeyê re dijî ev pêvajo ji bo civaka Tirkiyeyê tê çi wateyê? Li gorî me divê ev her du pirs bi hev re li ber çavan werin girtin.’’
‘CARA EWIL DI VÊ PÊVAJOYÊ DE HEBÛNA KURDAN HATE NASKIRIN’
Lamî Ozgen piştre diyar kir ku gelê Kurd ê di tevahiya sed salan de hate înkarkirin cara ewil li gel Pêvajoya Aşitî û Civaka Demokratîk hebûna wan hate nasikirin û got:
‘’Gelê Kurd ev sed sal in weke netew û gelekî tê înkarkirin û mafên wan hatin desteserkirin. Gelê Kurd li hemberî vê helwesta ku li ser vê polîtîkaya înkarê israr dike, tim li ber xwe daye û serî rakiriye. Dewleta Tirk jî piştgiriya hêzên navneteweyî standiye, êrîşên xwe domandine û komkujî pêk anîne. Ji ber vê yekê cara ewil di Pêvajoya Aşitî û Civaka Demokratîk de hebûna gelê Kurd hatiye qebûlkirin. Lê belê gelekî ku hatiye naskirin bi awayekî xwezayî mafên wan jî hene: Mafên neteweyî, siyasî û civakî hene. Baş e ev mafên siyasî, hiqûqî û çandî çawa pêk werin? Ji siyasetmedaran bigirin heya çandparêz û kedkaran wê dînamîkên civaka Kurd û aktîvîst çawa entegreyî vê pêvajoyê bibin?’’
‘ZEMÎNA HIQÛQÎ HEWCE YE’
Lamî Ozgen ji bo avakirina pêşerojeke hevapr a li gel civaka Tirkiyeyê bal kişand ser girîngiya reformên hiqûqî û ev yek anîn ziman: ‘’Girêdayî vê yekê di destpêkê de zemîneke hiqûqî hewce ye. Dema ku ev bingeha hiqûqî hate dabînkirin civaka Kutrd wê mafên xwe bi awayekî eşkere bi kar bînin wê hem li gel rê û rêbazên demokratîk jiyan û pêşeroja xwe ava bikin hem jî li gel civaka Tirkiyeyê pêşerojeke havpar ava bike.’’
‘ENTEGRASYONA DEMOKRATÎK BES NE JI BO AKTORÊN POLÎTÎK E’
Lamî Ozgen di dewama axaftina xwe de îfade kir ku entegrasyona demokratîk bes ne ji bo aktorên polîtîk û aktîvîstan e û got: ‘’Ji bo jinan e, ji bo ciwanan e, ji bo kedkaran e û ji bo hemû derdorên bindest e. Naskirina hebûn û mafên hiqûqî yên derdorên civakî yên bindest, wê di vê pêvajoyê de bi rê û rêbazên demokratîk derkevin pêş û di nava civakê de belav bibin.’’
‘JI BER ŞERÎ TÊKOŞÎNA BINDESTAN JÎ HATE KRÎMÎNALÎZEKIRIN’
Lamî Ozgen piştre destnîşan kir ku ji ber helwesta zextkar a li ser têkoşîna gelê Kurd têkoşîna kedê jî hate krîmînalîzekirin û ev yek anîn ziman:
‘’Bêguman di vê serdemê de hêzên kedkar û tevgerên karkeran roleke pir girîng dilîzin. Em dikarin bibêjin ku jiyan bi destê karker û kedkaran tê avakirin. Ev derdor, hêzên civakî yên sereke ne; ji ber wê yekê ew xwedî maf û daxwazan in. li gel mafên siyasî têkildarî jiyana karkirinê xwedî daxwazên hiqûqî ne.
Lê belê ji ber înkarkirina Kurdan û şerê heyî ev mafên sereke bi salan hatin çewisandin, kesên têkoşîna mafî bi rê ve dibirin jî hatin krîmînalîzekirin û sûcdarkirin. Di encama vê nêzîkatiya hêzên serdest de têkoşîna kedkaran hate çewisandin û bi helwesteke neyînî li nêzî wan bûne.’’
‘JI BER ÎNKARKIRINA KURDAN Û ŞERÎ MAFÊN KEDKARAN NEHATIN NASKIRIN’
Lamî Ozgen diyar kir ku li Tirkiyeyê sererastkirinên têkildarî mafên kedkaran ên navneteweyî ji ber înkarkirina Kurdan û şert û mercên şerî nehatine naskirin û got: ‘’Di gel ku li gelek welatan mafên karker û kedkaran bi qanûnî hatine misogerkirin jî li Tirkiyeyê ji ber înkarkirina Kurdan û şert û mercên şerî ev maf nehatine naskirin, peymanên eleedar ên navneteweyî nehatine îmzekirin û ew nexistine meriyetê.’’
‘DIVÊ KEDKAR PÊŞEROJA HEVPAR BIPARÊZIN’
Lamî Ozgen di dawiya axaftina xwe de diyar kir ku di vê pêvajoya nû de divê kedkar bernameyên xwe yên têkildarî entegrasyona demokratîk di nava sendîka û rêxistinên xwe de pêk çêbikin, banga meşandina têkoşîna hevpar li hemû derdorên civakî kir û ev yek anîn ziman:
‘’Di vê pêvajoya nû de divê hêzên kedkar û karker hem daxwazên xwe hem bendewariyên civakî hem jî bi nêzîkatiyeke demokratîk û aşitiyane hiqûqa hevpar û pêşeroja hevpar biparêzin, wan derxînin pêş û têkoşîna van yekan bimeşînin. Ji ber vê yekê divê karker û kedkar di sendîka û rêxistinên xwe de bernameyên têkildarî entegrasyona demokratîk amade bikin û van yekan pêk bînin. Divê bernameyên berbehs li gel hemû derdorên civakî werin parvekirin, derkevin qadan û daxwazên bi awayekî eşkere bînin ziman û têkoşîna hevpar were meşandin.
Rol û mîsyoneke dîrokî ya ku divê kedkar di vê pêvajoyê de bi cih bînin hene; divê ev berpirsiyarî bi biryardarî were bicihanîn.’’
