Pirtûka bi navê “Dayê-Ked û Rêya Dirêj a Berxwedanê” ya ku li ser jiyana Yadê Drexşan Îbrahîm, dayikeke berxwedêr a ji bajarê Silêmaniyê ye, li Navenda Civaka Demokratîk a Kurd li Koln a Elmanyayê hate nasandin.
Ji bilî Yadê Drexşan Îbrahîm, gelek dayik, hunermend û Kurdên ji her çar perçeyên Kurdistanê û Roza Hem Salih a ku pirtûk ji Erebî wergerand zaravayê Soranî yê Kurdî jî beşdarên çalakiyê bûn.
Keça Yadê Drexşan Sirûşt Cemal axaftina ewilî kir. Nivîskara pirtûkê Ronak Murad bi dîtbarîî beşdarî çalakiyê bû û pêvajoya nivîsandinê û wateya berhemê parve kir.
Di axaftinan de bal kişandin ser çawa dayiktî û têkoşîn bi hev ve girêdayî ne û jiyana Yadê Drexşan a bûye çîrokeke sembolîk a berxwedanê.
Çalakî bi konserên Hunermend Hozan Comerd, Bermal Çem, Nebez Abdullah û koroya muzîkê bi dawî bû.
ÇÎROKA YADÊ DREXŞAN
Drexşan Îbrahîm di sala 1996’an de salekê li qada Rêber Apo ma û perwerde dît û ji aliyê Rêber Apo ve navê “Yadê” lê hat kirin. Ji wê rojê û pê ve, di her qada têkoşînê de bi vî navî tê nasîn.
Sê kurên Yadê Drexşan Îbrahîm, Xemgîn û Şahîn di sala 1997’an de û kurê wê Bakur Cîlo jî di sala 2016’an de di berxwedana taxa Eşrefiyê ya Helebê de şehîd bûn.
