Navenda Ragihandinê ya QSD’ê têkildarî êrîşên dagirkeriyê yên 24 saetên dawî û çalakiyan daxuyaniyek da. Daxuyanî bi vî rengî ye:
“Dewleta Tirk a dagirker û çeteyên wê êrişên xwe li ser herêmên Bakur û Rojhilatê Sûriyeyê didomînin. Tevî ku di êrişan de hemû cureyên çekan bi kar tînin, lê bi saya berxwedana şervanên me nikarîn li eniyan pêşde werin.
Eniya Bendava Tişrînê; artêşa Tirk a dagirker tevahiya şeva şemê/yekşemê bi obîsên giran û guleyên hawanan derdora Bendava Tişrînê topbaran kirin. Di heman demê de belafirên şer û yên bê mirov li herêmê digeriyan. Dema ku çeteyan amadekariyên êrişekê li dijî nuqteyên hêzên me yên li gundewarê bakurê bendavê dikirin, Yekitiyên Şehîd Harûn li kombûna wan da. Di encamê de çeteyek hat kuştin û hin birîndar bûn.
Li gundê Îmamê yê eniya Dêr Hafirê du çeteyan hewl dan bikevin nuqteyek hêzên me û gule li hêzên me reşandin. Şervanan bersiva êrişê dan û çeteyek birîndar bû.
Eniya Qereqozaxê, hêzên me li dijî nuqte û stargehên dagirker û çeteyan 3 çalakiyên serkeftî li dar xistin. Di encamê de hin çete birîndar bûn, lê hejmara wan nehat tesbîtkirin.
Balafirên şer ên dijmin, rêze êrişî li dijî gundên Tîna, Melha, Xeseq, xaçerêya Sirînê pêk anîn. Di encamê de zerarên madî li milkên sivîlan bûn. Her wiha çete û dagirkeran bêserûber gundên Tîna, Cada, Bîr Hiso, Xeseq, Dîkan, Melha, Sinaa, girên Sêvê û Qereqozaxê bi obîsên giran, tank, roket û hawan topbaran kirin. Gundên navborî bi zêdetirî 50 guleyan hatin topbarankirin û di encamê de zerarên madî yên mezin li mal û milkên şêniyan bûn.
Di tevahiya rojê de balafirên şer û yên bê mirov ên dewleta Tirk a dagirker li ser Kobanê, Eyn Îsa û gundewarên wan digeriyan.”
