Parêzer û endamê Însîyatîfa Parêzerên Sûriyeyê Cibraîl Mustafa, der barê Komploya Navneteweyî ya 15’ê Sibatê ya li dijî Rêber Apo, berxwedana li Îmraliyê û bangên Rêber Apo de ji ANF’ê re axivî.
Parêzer Cibraîl Mustafa, diyar kir ku Rêber Apo 26 sal in di sîstema Îmraliyê de tecrîdkiriye û got ku ji mafên xwe yên mirovî û hiqûqî jî hatiye bêpar hiştin. Mustafa, destnîşan kir ku têkiliyên Rêber Apo ya bi cîhana derve re bi temamî hatiye qutkirin û got ku destûr nayê dayîn ku Rêber Apo li gel malbat û parêzerên xwe hevdîtinê pêk bîne. Mustafa, anî ziman ku ev kiryar û pêkanînên li ser Rêber Apo tên ferzkirin, zagonên navneteweyî jî binpê dike, got ku di destûr û hiqûqa Tirkiyeyê de jî cihê van pêkanînan nîne.
Parêzer Cibraîl Mustafa, destnîşan kir ku dewleta Tirk ji bo çewisandina Serhildanên Kurdan, her tim pêşengên wê revandiye, girtiye û qetil kiriye û got, “Armanca komploya 15’ê Sibatê jî ev bû, dixwastin bi dîlgirtina Rêber Abdullah Ocalan re îrade û hebûna gelê Kurd tine bikin. Lê belê Rêber Abdullah Ocalan li dijî komployê sekinî û nîşan da ku têkoşîna gelê Kurd dewam dike. Rêber Abdullah Ocalan li Îmraliyê qonaxeke nû ya berxwedanê bi paradigmaya Neteweya Demokratîk û Şaristaniya Demokratîk da destpêkirin. Têkoşîna ji bo doza Kurdbûnê, veguherî têkoşîneke navneteweyî û li cîhanê belav bû.”
Parêzer Cibraîl Mustafa, da zanîn ku dewleta Tirk her tim bi zîhniyeta dijminahî û gotinên mîna ‘Ez ê Kurdan tine bikim’ tevgeriye û wiha domand, “Dewleta Tirk her tim di xîtabên xwe de di anî ziman ku ‘şerê PKK’ê dike û wê Kurdan tune bike.’ Lê îro Tirkiyê jî dizane ku heta pirsgirêka Kurd çareser nebe nikare çareseriyek ji pirsgirêkên welat re bibînin. Li ser vê bingehê yan wê tecrîda li ser Rêber Abdullah Ocalan rake û azadiya wî pêk were û rêya diyalogê hilbijêre, an jî wê siberoja dewleta Tirk weke siberojên dewletên dîtir ên qirker be.”
Mustafa di dewama axaftına xwe de diyar kir ku banga aşîtiyê ya ku ji aliyê tevgera netewî ve hatiye encama berxwedaneke mezin e û wiha got, ”Tevgera netewa Tirk yek ji tevgerên şofînîstin ên ku nawerîya xwe li ser esasê nebûnê Kurdistanê li Bakurê Kurdistanê avakiriye ye, lê dema ku îro ev tevger bangawazîya insyatîfa aşîtiyê dişîne, tê wateya ku Rêber Abdullah Ocalan di Îmralî de bi serketiye. Ji ber ku ev banga aşîtiyê ji aliyê tevgera netewî ya Tirkiyê encama Berxwedana demdirêj ê ku Rêber Abullah Ocalan di Îmralî de kiriye. Li aliyeke din em dîbînin ku dewleta Tirk vê mijarê bi awayekî cidî nagire dest, ji ber dixwazin tecrubeya 2013 û 1015 careke din dubare bikin, ruxmê Rêber Abdullah Ocalan di wan salan de jî banga aşîtî û çareseriya doza Kurdî dikir.”
Parêzer Mustafa Cibraîl, destnîşan kir ku eger îro dewleta Tirk hewl dide rêyek ji bo aştiyê veke, ev yek di encama berxwedana Rêber Apo de pêk hatiye û got, “Li aliyekê banga aştiyê dikin û li aliyê din kiryarên dijber pêk tînin. Rojane zext heye, bûyerên girtinê zêde bûne, dîlgirtina hevşaredarên li Bakurê Kurdistanê û hwd. Her wiha sîstema tecrîdê li ser Rêber Abdullah Ocalan hîna berdewam e. Dewleta Tirk sûcên xwe li hember gelê Kurd berdewam dike. Ev jî helwesta AKP’ê û dewletê ya seranser nîşan dide.”
Parêzer Cibraîl Mustafa, da zanîn ku kombûna gelan a li dora Rêber Apo rojane zêdetir dibe û wiha dom kir, “Eger Tirkiye dixwaze aştiyek rast ava bike, divê despêkê Rêber Abdullah Ocalan ji Îmralî derxe. Aştiya rast wê bi azadiya Rêber Abdullah Ocalan a fîzîkî pêk were. Ev yek bi hebûna rêxistinên navdewletî yên girêdayî neteweyên yekbûyî, her wiha bi beşdarbûba hemû partiyên siyasî ên li Tirkiyê dibe. Ji ber ku AKP’ê tenê temsîla îradeya gelê Tirkiyê nake, gelek partiyên demoratîk hene ku li dijî siyaseta tunekirinê ya AKP’ê têdikoş in. Her wiha divê hemû Civaka Sivîl di vê pêvajoya aştiyê de amade be û xwe bispêre bingehên destûrî. Mifteya çareseriyê û pêkanîna aştiyê li tevahiya Tirkiyeyê û Rojhilata Navîn Rêber Abdullah Ocalan e.”
