Çavkaniyeke leşkerî ya li gundewarên rojhilatê Dêrazorê diyar kir ku êrîşa îro sibehê li dijî xaleke kontrolê ya Hêzên Sûriyeya Demokratîk (QSD) li bajarokê Ebû Hemamê pêk hatiye, ji aliyê şaneyeke DAÎŞ’ê ve hatiye kirin, ew şane ji rojavayê çemê Firatê derbas bûne.
Çavkaniyê aşkera kir ku şaneya DAÎŞ’ê ji herêma Sibeyxan û çola di navbera El Meyadîn û El Bûkemalê de derbas bûye, ji ber ku wan herêman valahiya ewlehiyê heye, li wir xwe ji nû ve bi rêxistin dikin û derbasî deverên di bin kontrola Meclisa Leşkerî ya Dêrazorê dibin da ku êrîşan li dijî hêzên QSD’ê pêk bînin.
Hate destnîşankirin ku şervanên QSD’ê tavilê bersiva êrîşê dan û êrîş têk birin, êrîşkar jî vekişiyan cihê ku jê hatine.
Çavkaniyê destnîşan kir ku ev êrîş ne ya pêşî ye, ji ber ku çeteyan gelek caran hewl daye ku ji deverên di bin kontrola hikumetê de derbas bibin da ku êrîşên wiha pêk bînin.
Navenda Ragihandinê ya QSD’ê berê di daxuyaniyekê de ragihandibû ku wan êrîşa şaneyên çeteyên DAÎŞ’ê têk biriye û ji bo xurtkirina ewlehî û aramiya herêmê operasyonek pêk aniye.
