Malbatên şervanên QSD’ê yên ji aliyê hikumeta demkî ve dîl hatine girtin, diyar kirin ku hin malbat ji bo hevdîtina zarokên xwe dîlgirtî çûn Helebê û serî li navendên Hêzên Ewlekariya Hundirîn dan.
Malbatan destnîşan kirin hikumetê rê neda wan ku zarokên xwe bibînin û destnîşan kirin ku endamên hêzên ewlekariyê gef li wan xwarin ku eger kombûnê ji hev nebin wê werin revandin.
Hejmarek malbatên dîlgirtiyan ji ANHA’yê re diyar kirin ku hinek malbat piştî ku bertîl dan, agahî der barê cihên ragirtina zarokên xwe wergirtin.
Li gorî malbatan, ji wan re hatiye gotin ku dîlgirtî di beşa ewlehiya leşkerî ya li Çerxerêya Basil in û beşa ewlehiya siyasî ya li taxa Silêmaniyeyê ragirtî ne.
Her wiha hate gotin ku zindaneke veşartî di jêrzemîneke avahiyekê de di navbera Mizgefta Rihman û Stadyuma Ciwanan a li Helebê hatiye avakirin û hin zindanên din ên veşartî hene.
Ji malbatan re hate diyarkirin ku hin girtîgeh li herêma Şiqêf a bakurê taxa Şêxmeqsûdê jî hene û hin dîlgirtiyên sivîl û leşkerî di girtîgehên Minbic, Hums û girtîgeha Eqtanê ya Reqayê de têne ragirtin.
