Li Tirkiyeyê lêgerînên li aştiyê û komîsyona çareseriyê ya li meclîsê ava bû, cihê xwe yê di rojevê de diparêzin. Siyasetmedar Ahmet Yildirim pêvajo nirxand.
Yildirim ragihand ku lêgerînên aştiyê yên Rêber Apo nû nînin, herî kêm beriya 32-33 salan destpê kir û got, “Piştî hilweşîna reel sosyalîzmê di 17’ê Adara 1993’an de li Bar Eliasê bi qasidên Serokkomar Tûrgût Ozal re hevdîtin kir. Ew hevdîtin weke prototîpa deklarasyona 27’ê Sibatê bûn.”
Yildirim bi bîr xist ku Rêber Apo wê demê jî got, avaniya têkoşîna çekdarî guherî ye û divê ev yek bi aştiyê bi encam bibe.
Yildirim destnîşan kir ku Rêber Apo li gorî şert û mercên guherî yên cîhanê xwe, rêxistin û têkoşîna xwe revîze kir, li gorî cîhan a hemdem çareseriyeke guncaw destnîşan kir, lê belê ji ber ku desthilatdariyên li Tirkiyeyê ‘jiber a Tirk’ û fobî nekarî ji ser xwe biavêjin, lêgerîna li aştiyê ne bi bi dînamîkên navxweyî yên welêt, lê bi neçariya ji bûyerên herêmî dan destpêkirin, ku ev yek cihê nerazîbûnê ye.
Yildirim pêvajoya li Ewropayê weke mînak nîşan da, ku piştî şerên cîhanê yên yekemîn û duyemîn aştî ava kir û bi bîr xist ku ev dîroka bi êş veguherî aştiyeke mayinde.
Yildirim anî ziman ku li Tirkiyeyê di şer de nêzî 50 hezar mirovî jiyana xwe ji dest dan û got, bi xwespartina li vê êşê nabe ku bi salan siyaseta kîn û tolhildanê bê sorkirin. Yildirim diyar kir ku Tirkiye ku parçeyek ji Rojhilata Navîn e li şûna êşên li vê cografyayê ji nû ve dubare bike, divê li mînakên derve binihêre û ‘aştiyeke model’ ava bike.
Ahmet Yildirim ragihand ku yek ji astengiyên herî mezin ên li pêşiya pêvajoyê ew e ku siyasetmedar hesabên xwe yên hilbijartinê datînin pêşiya paşeroja hevpar a 86 milyon mirovî û got, “Kî vê yekê îro dubare bike wê li pêşberî dîrokê berpirsyar be.”
Yildirim karê komîsyona li meclîsê nirxand û anî ziman ku komîsyon niha tenê bi nêzîkatiya ‘nîşandana nêtê’ tevdigere.
Yildirim destnîşan kir ku ji bo pêvajo bi rê ve biçe divê komîsyon teqez gavên şênber biavêje. Yildirim ragihand ku ev gav jî divê bi guhertinên qanûnî yên li Civata Giştî ya Meclîsê şênber bibin û got, “Gavên ku meseleya 100 salî çareser bike divê bêne avêtin.”
Ji bo jî destnîşan kir ku piştî hevdîtinan, li dû 1’ê Cotmehê divê pêşnûmeyên qanûnî yên şênber pêşkêşî Meclîsê bêne kirin, naxwe komîsyon wê keda xwe bi xwe têk bibe.
Ahmet Yildirim anî ziman ku ji bo rêveçûna pêvajoyê yek ji gavên girîng ên divê bêne avêtin ew e ku rayedaren dewletê û komîsyon li Rêber Apo guhdarî bike û got, “Li şûna ku vê yekê li pêşiya raya giştî nîqaş bikin, divê biryareke bi wêrekî werbigire, ya divê komîsyon Birêz Abdullah Ocalan vexwîne Enqereyê, yan jî kesên ji her partiyê bi xwe biçin Îmraliyê û hevdîtinê bikin.” Yildirim got, “Divê pêşniyarê şênber jê werbigirin ku rêxistina xwe fesix kir û dawî li çek û tundiyê anî.”
