Endamê Desteya Rêveberiya Navendî ya DEM Partiyê Mûrat Mihçi anî ziman ku komîsyona çareseriya pirsgirêka Kurd hîmê parlamenteran ê pêvajoyê xurt kiriye, ku di danûstandinên berê de ev yek timî kêm dima û got, ev komîsyona ku hema hema hemû beşên civakê lê tê temsîlkirin, ji bo afirandina zemîneke kar a demokratîk gelekî girîng e.
Mihçi ragihand ku ev pêvajo ji bo afirandina aştiyê ya li Tirkiyeyê û hevkariya derdorên demokratîk gaveke girîng e.
Mihçi bi dewamî got, “Bawer dikim ku wê komîsyonên jêrîn jî ava bibin û ji derdorên cuda yên civakê mirovên cuda yên li ser van mijaran xwedî fikirin wê beşdarî karên komîsyonê bibin û tevkariyê lê bikin. Ev yek pêşketineke gelekî girîng û hêja ye. Avabûna vê komîsyonê ji bo afirandina aştiyê ya li welêt, wê derfeta gotin û karkirinê bide derdorên demokratîk.”
Mihçi destnîşan kir ku paşeroja vê komîsyonê jî wê bi hewldanên aştîxwaz û alîgirên demokrasiyê yên li Tirkiyeyê diyar bibe û got, “Naxwe wê komîsyon ji destpêkê ve bibe hedefa rexneyan, daxuyaniyên neyînî; serketina xwe wê zehmet be.
Lê belê diyar e ku di nava civakê, gelan û hemû derdorên baweriyan de daxwazeke xurt a ji bo serketina vê pêvajoyê heye. Ev daxwaz bi bandora konjonktura li Rojhilata Navîn hîn xurt bûye. Bi sohbetên bi hevalên xwe re yên ku beşdarî civîna destpêkê ya komîsyonê bûn û ji daxuyaniyên Birêz Nûman Kûrtûlmûş hate dîtin ku komîsyonê destpêkeke baş kir û vê pêvajoyê hêja dibînim.
Civîna destpêkê ya komîsyonê civînek şêwirmendiyê û li ser diyarkirina avaniya wê bû. Ji ber vê yekê divê bendewariyeke ku pirsgirêk di nava çend mehan de bêne çareserkirin pêşkêşî civakê neyê kirin. Ev yek wê ne rasteqîn be.”
Mûrat Mihçi ragihand ku pêvajoya bi şewitandina çekan a sembolîk a PKK’ê re destpê kir bû wesîle ku ev komîsyon ava bibe û got, “Ev yek ne ew maseya ‘min da û stend’ e. Daxwazên demokratîk ji xwestekê bêhtir rastiyekê îfade dikin. Ev daxwaz divê li gorî hiqûqa gerdûnî û qanûnên Tirkiyeyê di nava ahengiyê de bi cih bê anîn. Divê ev pêvajo weke bendewariyeke berjewendiyan neyê dîtin.”
Mihçi destnîşan kir ku perwedeya bi zimanê dayikê, berdana girtiyên siyasî û nexweş divê bibin mijarên sereke yên rojeva komîsyonê û ev daxwaz jî ne weke jestekê lê belê weke rastiyekê bibîne.
Mihçi got, “Muxatabekî girîng ê vê pêvajoyê Birêz Ocalan e. Girîng e li nêrîna wî û rêxistina wî bê guhdarîkirin, komîsyon bi van aliyan re hevdîtinê bike û çareseriyê hilberîne. Ji bo nêrînên herdu derdoran bêne nîqaşkirin derfet bêne afirandin ku ev yek ji bo rêveçûna erênî ya pêvajoyê girîng e.
Bi dîtina min em hîn li destpêka vî karî ne, yanî hîn alfabeya pêvajoyê jî nehatiye nivîsandin.”
