Di yekemîn civîna bilind a navbera Yekîtiya Ewropa û Ermenistanê de ku li paytext Erîvanê hate lidarxistin, ji bo xurtkirina têkiliyan peyam hate dayin. Civîna bilind weke nîşaneyeke lêgerîna Ermenistanê ya ji hevalbendê xwe yê kevneşop Rûsyayê tê dîtin.
Seroka Komîsyona Ewropayê Ursula von der Leyen anî ziman ku di nava atmosfera heyî ya jeopolîtîk de “dema lidarketina civîna bilind gelekî girîng e” û got, wê hevkariya xwe ya bi Ermenistanê re hîn bi pêş ve bibe.
Serokwezîrê Ermenistanê Nikol Paşinyan jî banga razemeniyan a ji Ewropayê hate kirin weke nêzîkatiyeke “dîrokî” pênase kir.
Di civîna bilind de li qadên ragihandin, enerjî, ewlekarî û aboriyê peyman hatin mohrkirin. Hate ragihandin ku Yekîtiya Ewropa dixwaze Ermenistanê bike yek ji navendên razemeniyê. Her wiha soz hat dayin ku di mijarên têkoşîna li hemberî dezenformasyon û ewlekariya hilbijartinê de piştgirî ji Ermenistanê re bê dayin.
Serokkomarê Fransayê Emmanuel Macron jî di çarçoveya danûstandinên li Erîvanê de got, paşeroja Ermenistanê li nava Ewropayê ye.
Endametiyeke gengaz a Ermenistanê ya ji bo Yekîtiya Ewropayê yek ji mijarên di rojevê de bû.
Paşinyan anî ziman ku ji bo endametiyê pêwîste şert û mercên pêwîst biafirin. Ermenistanê di sala 2024’an de qanûnek ku nêta xwe ya ji bo endametiya Yekîtiya Ewropayê eşkere dike, qebûl kiribû.
