Li dijî êrîşên hovane yên dewleta Tirk a faşîst li qadên gerîla berxwedana bi pêşengiya şervanên YJA Starê bi rengekî bê eman dewam dike. Artêşa Tirk a dagirker ku di van êrîşan de encama dixwest nekarî bi dest bixe û têk çû, ji bo têkçûna xwe ya li pêşberî gerîla veşêre vê carê êrîş bir ser Rojava. Artêşa Tirk ku bi barbarî êrîşî Rojava dike, li vê derê li berxwedana dîrokî ya gel, YPJ-YPG û QSD’ê rast hat. Bi destpêkirina êrîşan re gelê rêxistinbûyî li dora hêzên xwe yên parastinê civiya û li gel ewladên xwe dest bi berxwedanê kir. Li gel êrîşên giran ên li derdora Bendava Tişrînê jî li herêmê berxwedaneke dîrokî tê nîşandan. Em ji berxwedana Kobanê ya duyemîn re şahidiyê dikin.
Gerîlayên YJA Star û HPG’ê yên li çiyayên azad li çeperên berxwedanê li ber xwe didin, berxwedana dîrokî ya şervanên YPJ û YPG’ê silav kirin û hem li ser şerê dimeşînin hem jî berxwedana li Bendava Tişrînê nêrînên xwe bi ajansa me re parve kirin.
‘ÊRÎŞÊN LI SER BENDAVA TIŞRÎNÊ DEWAMA POLÎTÎKAYA QIRKIRINÊ YE’
Ji gerîlayên YJA Starê Esmer Salar got, “Artêşa Tirk a dagirker demeke li Bendava Tişrînê komkujiyan li gel dike, ji xwe re weke mafekî dibîne ku bi her awayî polîtîkaya qirkirinê li dijî Kurdan bimeşîne. Lê belê di sedsala 21’ê de Kurd êdî veguherîne Hêzeke mezin û Kurdên berê nînin. Îro radestiyeke welê ya Kurdan heye ku xwe diparêze, haya xwe ji xwe û hêza xwe ya parastinê heye. Weke Kurd me hebûna xwe dan qebûlkirin û em gelê herî qedîm ê vê xakê ne. Êdî em ê nehêlin ku kes li ser me hesaban bike. Yên ku vê qebûl nakin îro li çar parçeyên Kurdistanê êrîşan dikin. Êrîşên li ser Bendava Tişrînê jî dewama vê polîtîkaya qirkirinê ye. Li hemberî vê yekê bi pêşengiya YPJ, YPG û QSD’ê berxwedan û têkoşîneke mezin tê kirin. Wezîfeyek e ku li hemberî van êrîşan rûmeta mirovahiyê bê parastin. Em jî weke gerîlayên YJA Starê li hemberî êrîşên artêşa Tirk a dagirker li tunelên şer li ber xwe didin. Ne tenê li çiyayên Kurdistanê yan jî li Bendava Tişrînê li tevahiya cîhanê Kurd û dostên wan ên li dora îdeolojî û felsefeya Rêber Apo civiyan e, li ber xwe didin û têkoşînê mezin dikin.”
‘JI BO JIYANEKE AZAD DIVÊ EM ŞER BIKIN’
Gerîlaya YJA Starê Esmer Salar li dijî êrîşên artêşa Tirk a dagirker bal kişand ser ruhê berxwedanê yê gel û got, “Çawa ku weke gerîla em li dijî êrîşên artêşa Tirk a dagirker bi ruhê fedaî li ber xwe didin, îro jî ev ruh li Bendava Tişrînê bilind dibe. Li dijî artêşa Tirk a faşîst û dagirker, ruhê berxwedêr û fedaî yê gel ku xaka xwe diparêze, wê me bi ser bixîne. Rabûna li ber hebûna artêşa Tirk a dagirker a li ser vê xakê, sekneke mezin a rûmetî ye. Divê em ji bo jiyaneke azad şer bikin. Li dijî artêşa Tirk a dagirker em bi biryardariyeke mezin li ber xwe didin, gelê Kurd wê ti carî serî li ber van êrîşan netewîne. Ruhê Kurdan, ruhê gerîlayên azadiyê yên Kurdistanê ye.
Şoreşa ku di sedsala 21’ê de bi pêşengiya jinan hate kirin, wê gelê Kurd azad bike. Rabûna li ber êrîşên faşîst di heman demê de şerê li dijî mejiyê serwer ê mêr e. Berxwedana li Bendava Tişrînê hate kirin daxwaza me ya ji bo têkoşîneke hîn bi biryar û lêdana li artêşa Tirk a dagirker hîn zêde dike. Ev berxwedan divê ne tenê li Tişrîn û Rojava be. Ev berxwedan divê li çar parçeyên Kurdistanê li her derê belav bibe. Kurd divê bi temamî tevlî vê berxwedanê bibin û li her devera ku lê ne li dijî artêşa Tirk a dagirker şer bikin.”
‘BI SEKNA YPJ’Ê RE TÊKOŞÎNA AZADIYÊ WÊ HÎN MEZIN BIBE’
Gerîlayeke din a YJA Starê Dîren Çekdar jî işaret bi rola YPJ’ê kir û got, “Sekna bi rûmet a dayikên şehîdan a li hemberî dijmin û gotina ‘Em ji mirinê mezintir in’ moral û wêrekiyeke mezin dan me. Ev sekn wê dîrokê binivîsîne. Weke jin gelekî girîng e ku haya me ji hêza me hebe û li dijî dijmin xwedî seknekê bin. Çi li Rojava çi jî li Bakur, Başûr an jî Rojhilat, dayik hemû dayikên me ne, em jî ewladên wan e. Em zarokên vî gelî ne. Şerê li hemberî heman mejî heman armancan jî bi xwe re tîne û em di oxira vê armancê de şer dikin. Ev şer wê bi ser bikeve. ji tunelên şer heta bi tunelên berxwedanê yên li Bendava Tirşînê û Qereqozaxê serketin wê ya me be.”
‘TÊKOŞÎNA ME WÊ HETA AZADIYA RÊBER APO DEWAM BIKE’
Ji gerîlayênw HPG’ê Rêber Botan jî bal kişand ser berxwedana şervanên YPG û YPJ’ê ya li Bendava Tişrînê û got, “Weke gerîlayên azadiyê em jî bi salan e li çiyayên Kurdistanê têkoşîneke mezin dimeşînin. Têkoşîna me îro li tevahiya cîhanê deng veda. Dewleta Tirk a dagirker bi salan e li çiyayên Kurdistanê li dijî gerîlayên azadiyê bi hemû derfetên xwe yên teknîkî û bi hemû hêza xwe êrîşan dike. Lê belê nekarî ji van êrîşan encamekê bi dest bixe û dewleta Tirk a bi piştgiriya NATO’yê gelek caran li van çiyayan têk çû. Bi artêşa Tirk a dagirker û çeteyên wê re îradeya şerkirinê û wêrekî nema. Yekane tişta ku pişta xwe pê germ dikirin teknîk bû, ew jî li pêşberî gerîla bê encam ma. Îro artêşa Tirk a dagirker heman têkçûnê li Bendava Tişrînê ji YPJ, QSD û gelê berxwedêr dibîne. Ev berxwedana li Bendava Tişrînê nîşaneya herî mezin a vê yekê ye. Weke gerîlayên azadiyê em xwedî li vê berxwedanê derdikevin û piştgiriyê didin. Ev berxwedan wê teqez bi ser bikeve.”
