Partiya Demokrasî û Wekheviyê ya Gelan (DEM Partî), Partiya Herêman a Demokratîk (DBP) bi munasebeta salvegera darvekirina 54’emîn a Denîz Gezmîş, Yusuf Aslan û Huseyîn Înan daxuyanî da.
Di daxuyaniya DEM Partiyê de ev tişt hate gotin: “Xewna xwişk-biratiya gelan, welatek sosyalîst û demokratîk a 3 şoreşgeran li ser vê axê hêj zindî ye. Em xwedî li mîrasa wan têkoşînê derdikevin û em soz dikin ku em ê ji bo welatek aştiyane, demokratîk û azad têbikoşin. Xewna wan nîvco nema dê nîvo nemîne. Em wan jibîr nakin, em ê jibîr nekin.”
DBP’ê li ser hesabê xwe yê medya dijîtal daxuyaniyek weşand û di daxuyaniyê de got: “Darexaçên ku di 6’ê Gulana 1972’yan li Girtîgeha Ulucanlar a Enqereyê hatin danîn, ne tenê sê şoreşger lê hêviya azadiyê ya gelan, têkoşîn û daxwaza jiyanekê birûmet hedef girtiye. Mîrasa Denîz Gezmîş, Huseyîn Înan û Yusuf Aslan ji bo ne tenê bibîranîn e, xeta berxwedanê ye. Hişmendiya ku sê şoreşger bi darve kir û ya mafên gelên Kurd xesp kir, heman e. Bila bê zanîn ku ne taritiya 12’yê Adarê ne jî rejîmên faşîst ên îro karîbûye meşa me ya azadiyê bide rawestanin. Em wek DBP, mîrasa Denîz, Mahîr, Îbrahîm, Sakîne û Mazlûman hildigirin. Em soz didin ku em ê doza wan bi têkoşîna ji bo jiyanekê demokratîk, ekolojîk û azadîxwaziya jinê bidomînin. Em ê taritiya 6’ê Gulanê bi têkoşîna yekbûyî ya gelan ve ronî bikin.”
