Tevgera Azadiya Jinên Êzidî (TAJÊ) di Kongreya 3’yemîn ku 18’ê Gulanê li Geliyê Kersê lidar xist de, ragihand ku êdî wê ji vir û şûnve demokrasiya rasterast a hemû jinan hembêz dike esas bigire. TAJÊ her wiha biryara veguherîna pergala xwe da û derbasî avakirina komînên jinan bû. Gelek delegeyên kongreyê jî ji aliyê komînên nû yên jinan ve hatin hilbijartin û tevlî kongreyê bûn.
Jinên tevlî kongreyê bûn ku di komînan de cih digirin ji ajansa me ANF’ê re axivîn. Jinên Êzidî pêkhatina kongreyê li Rêber Apo, şehîdan û hemû jinên Êzidî pîroz kirin.
Endama Komîna Jin a Guhbel Dayê Zozan Simo wiha got, “Em kongreyê li Rêber Apo, şehîdan û hemû civaka me ya Êzidî û jinên çar parçeyên Kurdistanê pîroz dikin. Hêvî dikim kongre, me vegerîne ser çand û cewhera me. Armanca me ya sereke li her deverê avakirina komînan e. Dema komîn avabûn em ê vegerin ser cewhera xwe. Komîn dikarin pêşî li fermanan bigirin. Eger komînên me hebaya, dê ewqas keç û jinên Êzidî nehatiban dîl girtin. Wê têkoşîna me ya ji bo dîl girtiyên me heya dawiyê dewam bike.’’
‘EM AZADIYA RÊBER APO WEKE AZADIYA CIVAKA XWE DIBÎNIN’
Yek ji biryara girîng a kongreya TAJÊ kar kirina ji bo azadiya Rêber Apo bû. Dayê Zozan Simo jî weke delegeyeke kongreyê daxwaza azadiya Rêber Apo dike û dibêje: ‘‘Em daxwaza azadiya Rêber Apo dikin. Ji ber em azadiya wî weke azadiya civaka Êzidî û jinan dibînin. Ji ber Rêber Apo rêzgirtineke mezin dide jinê. Fikrê Rêber Apo me li dora xwe kom kiriye. Em vê kongreyê li wan gerîlayên hatin me rizgarkirin jî pîroz dikin. Em jinên Êzidî çav girtîbûn û di nava çar dîwaran de bûn, heta me gundê xwe jî nas nedikir. Lê piştî me Rêbertî nas kir, çavê me vebû û bi xêra wî em li ser piyan e. Niha keçên me li çiyayê Şengalê parastina me dikin. Pirsgirêkên me ji aliyê keçên me yên asayîşê ve tên çareserkirin.’’
Endama Komîna Jin a Xanesorê Cano Şengalî jî balkêşa ser zehmetiyên jin ku ji ber desthilatiya mêr û zayendparêziyê rûberû dimînin û got, “Em vê kongreyê li hemû delegeyan pîroz dikin. Armanca me jinan komkirin, rêxistinkirin û tevlî komînan kirine.”
Endama Komîna Jin a Xanesorê Henan Nayîf jî wiha axivî, “Îro rojeke gelekî xweşe û keyfa min tê. Ji ber em li vir behsa têkoşîna jinan a li dijî zilm û zordariyê dikin. Jinên ji derve hatine bi taybet yên Mexmûrê jî li vir amade ne, em li vir êş û xweşiyên xwe parve dikin.”
