Komûna Hevgirtina bi Malbatên Şehîdan re, bi daxuyaniyeke nivîskî gerîla Jînda Şerker (Bêrîvan Meryem Uzkaş) bi bîr anî.
Komûnê, ragihand ku Jînda Şerker a di sala 1992’yan de li Mêrdînê jidayik bibû, di 3’yê Tîrmeha 2018’an de li qada Arîs Farîs a Avaşînê di êrîşeke balafiran de şehîd ketibû.
Agahiyên derbarê nasnameya hevrê Zozan Denîz bi vî rengî ne:
Nasnav: Jînda Şeker
Nav û Paşnav: Bêrîvan Meryem Uzkaş
Cihê Jidayikbûnê: Mêrdîn
Navê Dayik-Bav: Vesîle-Nezîr
Cih û Dîroka Şehadetê: 3’yê Tîrmeha 2018/Avaşîn
Daxuyaniya komûnê bi vî rengî ye:
“Erdnîgariya Mêrdînê di her qonaxê dîrokê de yek ji wan navendên me yên berxwedanê ye ku tê de çandên xwedî kok, kevneşopiyên berxwedanê û rûmeta civakî mîna keleheke nehej hatine parastin û hişmendiya welatparêziya kevnar tê de zindî hatiye girtin.
Li van xakên pîroz ku polîtîkayên mêtînger, ferzkirinên asîmîlasyonê û êrîşên bênasnamekirinê tu carî bi ser neketine, mezinbûn tê wateya ku mirov di temenê biçûk de bi hişmendiya şoreşgerî û evîna azadiyê re bijî. Hevrêya me Jînda Şerker ku di nava malbatekê de hat dinyayê ku bi vê kevneşopiya welatparêziya kûr a Mêrdînê û çanda herêma Torî ya kevnar ve girêdayî ye, di atmosfereke ku exlaqê civakî û hişmendiya neteweyî pir xurt bû de mezin bû. Beşdarbûnên ji derdora malbata wê û xizmên wê yên nêzîk bo nava refên Têkoşîna Azadiya Kurdistanê, cîhana raman û hestên hevrê Jînda di temenê biçûk de ava kir.
Hevrê Jînda ku 4 salan di dibistanên pergalê de perwerde dît, gava ferq kir ku çerxa modernîteya sermayedar dixwaze ciwanan ji cewherê wan veqetîne, perwerdeya xwe nîvco hişt. Ji bo ku debara xwe û malbata xwe bike, di temenê biçûk de gav avêt nava jiyana kar; di karên cuda de xebitî, li ser lingên xwe rawestiya û pîroziya xêr û bêra xebatê û keda eniyê ji nêz ve nas kir. Her çend ew li metropoleke mîna Stenbolê ku modernîteya sermayedar û polîtîkayên asîmîlasyonê lê herî dijwar in dirêj ma jî, bi saya wê çanda welatparêziyê ya kûr ku ji Mêrdîn û herêma Toriyan girtibû, karî cewherê xwe yê Kurdayetiyê, nirxên xwe yên civakî û azadîxwaziya xwe zindî bihêle. Wek jineke ciwan a Kurd, li dijî hişmendiya pergala mêrê serdest û modernîteya sermayedar ku jinê dike kole û tişt, ket nava lêpirsîneke kûr û têkoşîneke dijwar. Di encama van lêgerînan de beşdarî xebatên ciwanên şoreşger bû û bi awayekî çalak cîhê xwe di şerê hebûnê yê gelê me de girt.
Di payîza 2014’an de, gava çeteyên DAÎŞ’ê û navendên mêtînger li dijî destkeftiyên gelê me êrîşên tunekirin û qirkirinê yên giştî dan destpêkirin, hevrê Jînda berpirsyariyeke dîrokî hilda ser milên xwe, berê xwe da çiyayên Kurdistanê û beşdarî refên gerîla bû. Piştî beşdarbûnê, ji bo perwerdehiyên xwe yên yekem derbasî Herêmên Parastinê yên Medyayê, herêma Qendîlê bû. Hevrêya me ku li Qendîlê tevlî perwerdeya Şervanên Nû bû, di demeke kurt de xwe hînî şert û mercên dijwar ên çiyayan kir û gavên xwe yên yekem ên gerîlatiyê avêtin. Di pratîka xwe ya yekem de li qada Qendîlê, xwe bi îdeolojiya Rêber Apo bi berdewamî perwerde kir; guherîneke fikrî jiya û di pîvanên jina azad de asteke xurt bi dest xist. Di demeke kurt de erdnîgariya dijwar a çiyayan nas kir, bêtir li ser qadê serwer bû û di rêgezên xweparastin û gerîlatiyê de kûr bû.
Hevrê Jînda ku dixwest pêşketina xwe ya di gerîlatiyê de bi pisporiya leşkerî tacîdar bike, di dawiya sala 2015’an de li Qendîlê li Akademiya Şehîd Mahîr beşdarî perwerdeya Çekên Giran bû. Di dema akademiyê de di warê çekên giran de serweriyeke teknîkî û şarezayiyeke taktîkî ya bilind bi dest xist. Hevrêya me ku helwesta xwe ya îdeolojîk bi pisporiya leşkerî re kir yek, şêwaz û taktîkên gerîla yên demê pênase kir û bi îdîa û biryardariyeke mezin ji akademiyê mezûn bû.
Di buhara sala 2016’an de, ji bo ku di gerîlatiya Bakur de tecrubeyan bi dest bixe û bi xwe rasterast li dijî dijmin şer bike, derbasî qada Cîloyê bû. Hevrê Jînda ku di erdnîgariya biheybet, dijwar û zehmet a Zagrosan de pratîk dimeşand, li dijî êrîşên artêşa dagirker bi îrade, ezm, sebir û biryardariyeke mezin têkoşiya. Di çeperên herî dijwar ên Cîloyê de wek gerîlayeke pispor a YJA Starê rola xwe lîst û bi wêrekiya xwe ya bilind di pêvajoyên çalakiyan de ji hemû hevrêyên xwe re bû çavkaniya hêz û moralê.
Hevrê Jînda Şerker di sala 2017’an de derbasî eyaleta Avaşînê bû û meşa xwe ya şoreşgerî û pratîka xwe ya leşkerî di vê qada stratejîk de jî domand. Hevrêya me ku bi girêdaneke xurt bi xeta PAJK’ê û pîvanên militaniya PKK’ê ve girêdayî bû, bi hêza ku ji Jineolojiyê girtibû, pîvanên azadiya jinê di her kêliya jiyanê de bi rengekî xurt nîşan da. Hevrê Jînda ku ji kûrayiya dilê xwe ve dilsoza Rêber Apo, bîranîna şehîdên me yên ezîz û hevaltiyê yên pîroz bû, di her hawirdorê de hevaleke pêşeng bû ku nirxên şoreşgerî yên bilind mezin dikir, diparast û nirxên nû diafirand. Li dijî operasyonên dewleta Tirk ku li Avaşînê pêş xistibûn, bi sekna xwe, zîrekiya xwe ya taktîkî û wêrekiya xwe bû mînak û hezkirin û hurmeta kûr a hemû hevrêyên xwe bi dest xist.
Hevrêya me ku li eyaleta Avaşînê peywirên xwe yên şoreşgerî û meşa xwe ya fedaî bi biryardariyeke mezin didomand, di 3’yê Tîrmeha 2018’an de di encama êrîşeke balafiran de li qada Arîs Farîs a ser bi Avaşînê ve gihîşt şehadetê û tevlî karwana nemiran bû.
Em hevrêya xwe Jînda Şerker, gerîlaya pêşeng a YJA Starê ku çanda welatparêziya esîl a Mêrdînê ji metropolan hilda û bir çeperên Qendîl, Cîlo û Avaşînê û bi helwesta xwe bû fedaî, bi rêz, minetdarî û girêdaneke xurt bi bîr tînin. Di serî de em ji malbata hêja û welatparêz a hevrêya me û gelê Mêrdînê re, ji hemû gelê Kurdistanê re sersaxiyê dixwazin. Em soz didin ku em ê bîranîna şehîdê xwe, sekna wê ya fedaî û ala têkoşînê ku ji me re hiştiye, di meşa xwe ya Kurdistana Azad û Rêbertiya Azad de teqez bi serkeftinê tacîdar bikin.”
