Meclîsa Kongra Star têkildarî cezayê darvekirinê yê li dijî çalakvan Pexşan Ezîzî daxuyaniyeke nivîskî weşand.
Di daxuyaniyê de hat bibîrxistin ku dewleta Îranê bi zihniyeta xwe ya otorîter û despotîk, siyaseta xwe ya çewisandinê yên li dijî her kesê ku gotina heqîqet û azadiyê bîne ziman û bi taybetî li hemberî jinên berxwedêr didomîne.
Di daxuyaniyê de hate destnîşankirin ku biryara darvekirinê ya li dijî çalakvan Pexşan Ezîzî rûyê rastîn ê pergala meleyan aşkere dike. Hate diyarkirin ku ev dewlet hewl dide bi rêya pêkanîna zextan li ser gel û jinan krîzên xwe yên bi derve re binxumîne.
Di daxuyaniyê de Pexşan Ezîzî wekî “sembola jina azad a li hemberî alava çewsîner têdikoşe” hat pênasekirin. Bang li tevahî jin û civakan hate kirin ku li hemberî siyasetên pergala despotîk û qirkirinê têkoşînê mezin bikin.
Di dawiya daxuyaniyê de hate gotin: “Em ê çalakiyên xwe berdewam bikin heta cezayê darvekirinê were betalkirin û siyasetên qirkirinê yên li dijî îradeya jin û civakên azad werin bidawîkirin.”
