Hikûmeta Peru şeva 28’ê Mijdarê li ser sînorê Şîliyê ji bo 60 rojan Rewşa Awarte ragihand û diyar kir ku ji bo xurtkirina kontrola li herêmê wê leşkeran bişîne.
Rêveberiya Lîma fikara xwe anî ziman ku eger li Şîliyê namzetê rastgirê tund Jose Antonio Kast hilbijartinên serokatiyê qezenc bike, wê koça girseyî çêbibe. Kast di kampanyaya hilbijartinê de soz dabû ku ew ê koçberên bê rêkûpêk bi rengekî komî dersînor bike.
Li gorî biryarnameya hikûmetê Polîsên Neteweyî yên Peruyê wê li herêmên sînor rêkûpêkiyê çêbike û yekîneyên leşkerî dê weke hêza piştgiriyê wezîfe bimeşînin.
Ji Wezareta Karên Hundir Vicente Tiburcio ragihand ku di etaba ewilî de wê 50 leşker bên şandin, di serê Kanûnê de jî wê 50 leşkerên din sewqî herêmê bên kirin.
Di dîmenên ji herêma Arica a li aliyê Şîliyê de hate dîtin ku bi dehan kes li deriyê sînor ê Chacalluta–Santa Rosa hewl didin derbasî Peruyê bibin. Hin koçberên Venezuealî diyar kirin ku ew li Şîliyê ji ber îhtîmala dersînorkirina bi zorê, bi fikar in.
Wezîrê Ewlehiyê yê Peruyê Luis Cordero got, gelek koçber dixwazin welêt biterikînin, lê di derbasbûna Peruyê de zehmetî dijîn.
Li Şîliyê di tura duyemîn a 14’ê Kanûnê de Kast li hemberî çepgir Jeannette Jara favorî tê dîtin. Kast dibêje ku ew ê 330 hezar koçberên bê rêkûpêk ên li welêt, bi taybetî yên ji Venezuelayê, dersînor bike.
Peru di Nîsana 2023’yan de ji ber zêdebûna koça ji Şîliyê, ji bo du mehan gelek leşker sewqî sînor kiribû û Rewşa Awarte ragihandibû.
