Federasyona Gaziyan a Bakur û Rojhilatê Sûriyeyê bi wesîleya salvegera hefteya qehremaniyê (21’ê Adar-28’ê Adarê) daxuyaniyeke nivîskî weşand.
Daxuyaniya Gaziyan bi vî rengî ye:
“Di dîrokê de kêliyên herî zêde wateyê didin rastiya gelê Kurd û hebûna mirovên Kurd îfade dikin, têkoşîna Mazlûman a li Zindana Amedê û Pêngava 15’ê Tebaxê ya di pêşengiya fermandar Egîd de ye. Wan lehengên Apoyî bi berxwedana xwe gelê Kurd ji xewa, giran şiyar kirin. Bi têkoşîn û berxwedana lehengên Apoyî êdî dagirker jî neçar man, hebûna gelê Kurd qebûl bikin.
Di dîroka gelê Kurd a hemdem de ji şehadeta heval Mazlûm Dogan (21’ê Adarê) heta şehadeta heval Mahsûm Korkmaz (28’ê Adarê) weke Hefteya Qehremaniyê tê pênasekirin. Bi vê wesîleyê em di şexsê pêşengên xwe yên bi rûmet Mazlûm Dogan û Mahsûm Korkmaz (Egîd) de tevahî şehîdên azadiyê bi bîr tînin.
Hefteya Qehremaniyê bi têkoşîna Rêber Apo pêşengiya wê dike ji bo tevahî şervanên azadiyê, gelê Kurd û tevahî gelên bi hesreta azadiyê ne, bûye rêûresmeke pîroz a berxwedanê. Gelê Kurd ê şîara “Berxwedan Jiyan e” ya hevrê Mazlûm Dogan ji xwe re kir bingehê têkoşînê, bi xwe re gelên din jî şiyar û serwext kir.
Îro eger awir û çavên hemû mirovatiyê bi heyraniyeke mezin li ser şoreşa Bakur û Rojhilatê Sûriyeyê ne ev bi saya berxwedan û mîrasa Mazlûm û Egîdan e. Bi sedan şervanên navên Mazlûm û Egîd li xwe kirin, li hember çeteyên herî hov ê cîhanê DAIŞ’ê û dagirkeran şerekî wê bi sedsalan were behskirin pêş xistin. Ew şervanên rûmetê bi fikir û felsefeya Rêber Apo yê hevrêyê herî esîl ê Mazlûm û Egîdan e xwe perwerde kirin û bi lehengî şer kirin. Gelek ji wan lehengan bi dirûşma, ‘Bijî Serok Apo’ gihiştin mertebeya şehadetê û birîndar bûn.
Weke gaziyên şer ji bo di vê rêya şeref û rûmetê de me ji bedena xwe parçe dane, em pir serbilind in. Li ser vî esasî em Hefteya Qehremaniyê li hemû gelên azadîxwaz pîroz dikin. Divê gelên me ji bo xwedî leheng û qehremanên wer esîl in timî serbilind û şanaz bin. Wê têkoşîn û berxwedana gelan bi ruhê Mazlûman û Egîdan teqez bi ser keve. Bi Rêbertiya azad em ê cîhaneke herî azad, bedew û wekhev ava bikin.”
