Xwepêşandanên ku xwendekaran ji ber birîna budçeyê, mercên xerab ên dibistanan û siyaseta hikûmetê ya li ser ciwanan dabûn destpêkirin hîn bêhtir berfireh dibin.
Xwepêşandan cara yekem di 25’ê Îlonê de li Lîseya Saint-Exupéry ya li herêma Créteilê dest pê kir. Xwendekaran deriyên dibistanê bi barîkatan girtin. Ev çalakî di demeke kurt de derbasî herêmên wekî Sarcelles, Saint-Denis, Montreuil û Gonesse jî bûn.
Xwendekar nerazîbûn nîşanî mercên xirab û kêmbûna derfetên dibistanan didin. Ew daxwaza perwerdeyek çêtir û ji bo dibistanan zêdetir budçeyê dikin.
MAMOSTE JÎ BEŞDARÎ XWEPÊŞANDANAN BÛN
Mamosteyan jî piştgiriya daxwazên xwendekaran kir. Hin mamoste dereng ketin dersan û erka çavdêriyê negirtin ser xwe.
Tê payîn ku mamoste bi hejmareke zêde beşdarî greva xebatkarên cemaweriyê ya di 29’ê Îlonê de bibin. Di dema mudaxeleya polîsan de hin mamosteyan piştgiriya xwendekaran kir û li cem wan sekinîn.
KRÎZA DI PERWERDEYÊ DE HÊRSÊ MEZINTIR DIKE
Xwendekar û mamoste li dijî pirsgirêkên kevn ên perwerdeyê dertên. Qelebalixiya polan, kêmbûna mamosteyan û kêmahiyên materyalên dersê ji pirsgirêkên sereke ne.
Zêdebûna bihayê xwarina dibistanê û kêmkirina bursan jî hêrsa xwendekaran zêdetir dike. Her wiha, zehmetkirina pergala derbasbûna zanîngehê fikarên ciwanan ên ji bo siberojê kûr dike.
MÛDAXELEYA POLÎSAN Û BINÇAVKIRIN
Polîsan li ber hin dibistanan bi gaza rondikrêj mûdaxeleya xwepêşandêran kir û hinek xwendekar binçavkirin.
Xwendekar dibêjin ku ev mûdaxeleya polîsan ne hewce bû. Ji bo piştgiriya hevalên xwe yên hatine binçavkirin jî çalakiyên piştevaniyê tên kirin.
LI IVRY-SUR-SEINE’Ê MÛDAXELEYA POLÎSAN
Li navçeya Ivry-sur-Seine jî di navbera polîs û xwendekaran de alozî derket. Polîsan gaza rondikrêj bi kar anî û ji ber vê mûdaxeleyê zarok û jinên derdorê jî bandor bûn.
Hate ragihandin ku, polîsekî bi copê li jinekê daye û ew jin piştre rakirine nexweşxaneyê.
NÎQAŞÊN ‘MAFÊ KUŞTINÊ’ DI ROJEVA XWEPÊŞANDANAN DE NE
Xwendekar û mamoste li dijî qanûnên nû yên ku mafê bikaranîna çekan didin polîsan derdikevin. Xwepêşandêr difikirin ku ev qanûn dê rê li ber polîsan veke ku hêsantir hêza kuştinê bi kar bînin. Bi taybetî dibêjin ku ciwanên li banliyoyan dijîn dê ji vê rewşê zêdetir zirarê bibînin.
LI HEMBER KONTROLA POLÎSAN A LI DIBISTANAN NERAZÎBÛN
Xwendekar li dijî zêdebûna tedbîrên ewlehiyê yên li dibistanan jî nerazî ne. Ew dibêjin ew budçeya ku divê ji bo perwerdeyê bê xerçkirin, ji bo kamerayên ewlehiyê û kontrola polîsan tê xerçkirin.
ÇALAKÎ DÊ BIRDAVAM BIKIN
Tevî mûdaxeleya polîsan jî xwendekaran, diyar kir ku ew dê çalakiyên xwe bidomînin. Tê payîn ku li herêmên Créteil, Saint-Denis, Montreuil û Sarcellesê çalakiyên nû pêk werin.
