Bi sedan şêniyên kantona Reqayê, nûnerên Meclîsa Rêveber a Kantona Reqayê, nûnerên Hêzên Ewlekariya Hundirîn û Hêzên Sûriyeya Demokratîk li Pakrewangeha Şehîdan a bajarokê El Hikûmiye tevlî merasîma veşartina cenazeyê şervanê Meclîsa Leşkerî ya Minbicê şehîd Beşar Ebdulselam El Îbrahîm bûn.
Beşar Ebdulselam El Ibrahîm di 26’ê Kanûna 2023’yan de tevli Meclîsa Leşkerî ya Minbicê bû û di 12’ê Kanûna 2024’an de li bendava Tişrînê di berxwedana li dijî êrîşên dewleta Tirk a dagirker de şehîd bû.
Merasîm bi deqeyek rêzgirtinê destpê kir, piştre ji fermandarên Meclîsa Leşkerî ya Reqayê Siwar Reqa axivî û wiha got: “Beşar El Îbrahîm ji bo parastina herêmên Bakur û Rojhilatê Sûriyeyê li dijî êrîşên dagirkeriya Tirk tevlî refên Meclîsa Leşkerî ya Minbicê bû û di berxwedana li bendava Tişrînê de şehîd bû.”
Hevseroka Desteya Perwerdeyê ya Kantona Reqayê Zelîxa Ebdî behsa cesaret û îradeya şervanan kir û bal kişand ser girîngiya rola şervanan a di parastina ax û nasnameyê de.
Zelîxe Ebdî destnîşan kir ku ew ê têkoşîna şehîdan heta bidestxistina armancên xwe bidomînin û destnîşan kir ku wê fedakariya şehîdan vala neçe.
Piştre belgenameya şehîd ji aliyê Meclîsa Malbatên Şehîdan ve hate xwendin û radestî malbata şehîd Beşar hate kirin.
Cenazeyê şehîd bi dirûşmên “Bi can û xwîn em bi te re ne ey şehîd” spartin axê.
