Ji bo piştgirîdayîna berxwedana li Rojavayê Kurdistanê ya ku seferberiya giştî hate ragihandin, komek ciwanên Êzidî yên ji Şengalê derbasî bajarê Tirbespiyê yê Kantona Cizîrê bûn. Ciwan ragihandin ku ew li kêleka şervanên Rojava ne.
Li ser navê komê ciwanek vê daxuyaniyê da: “Berî her tiştî em hemû şehîdên xwe bi rêz û hûrmet bi bîr tînin, ji birîndarên xwe re şifayê zû dixwazin. Em wek ciwanên Şengalê li vir in. Em hatine ku bi şervanên YPJ û YPG’ê re mil bi mil bisekinin û Rojava biparêzin. Gelê Şengalê şoreşa gelê Rojava silav dike. Em jî parçeyek vê têkoşînê ne. Ji Şengalê gelek kom hene ku tên.
Di sala 2014’an de gel û şervanên Rojava bi lez hatin alîkariya hawara Şengalê û me ji qirkirinê rizgar kirin. Îro me dît ku dem hatiye em berpirsiyariya xwe li hember van axan, van gelan û van şervanan pêk bînin. Em heta nefesa dawî bi we re ne. Bi qasî ku di laşê me de dilopek xwîn hebe em ê axa Rojava neterikînin. Ji bo me axa Rojava û Şengal yek e. Li her devera cîhanê ji bo her Êzidî Rojava û Şengal yek in.”
Axaftin bi dirûşmeya “Bijî berxwedana Rojava” bi dawî bû.
