Şêwirmendê Rêveberiya Xweser Hesen Koçer ji ANF’ê re li ser Komploya Navneteweyî ya 15’ê Sibata 1999’an li dijî Rêber Apo axivî. Her wiha qala pêvajo û geşedanên ku niha li Rojava diqewimin kir.
Hesen Koçer di despêka axaftina xwe de wiha got, “Komploya navnetewî ya ku di sala 1999’an de pêk hatiye, di şexsê Rêber Apo de êrîşeke dijwar li ser Tevgera Azadiyê bû û armanc ew bû ku Tevgera Azadiyê tune bikin. Li aliyeke din xwestin di navber Kurd û Tirkan de şerekî derxin holê. Wê deme êşeke mezin bi gele Kurd re da çêkirin, ji ber ku ji bo Kurdan cara yekem bû ku serokekî bi vi awayî pêşengî dike û stratejiyek ji bo Kurdan danîbû. Di wir de xwestin hêvî û îradeya gelê Kurd bişkînin.’’
Di berdewamiya axaftina xwe de Koçer bal kişand ser mafê hêviyê û wiha got, ‘’Bi êrîşên li ser Rojava re komplo berdewam e. Hem jî di aliyê qanûnî de jî ev komplo berdewam e. Li hemû zîndanên cîhanê qanûn hene û mafê hêviyê esas tên girtin. Lê li Îmralî ti qanûnê dinyayê nayên pêkanîn. Ev tê wê wateya ku komployeke qanûnî jî li hember me heye. Divê em zanebûna vê yekê de bin û têkoşîna xwe ji bo pêkanîna mafê hêviyê ji bo Rêber Apo bilind bikin. Dewletên navnetewî û dewleta Tirk naxwazin ev maf ji bo Rêber Apo were pêkanîn. Li aliyek din hinek hêzên ku di nav Tirkan de hene dixwazin şer berdewam bike û pêvajoya aştiyê têk bibin. Ji bo wê jî divê ji bo pêkanîna vê mafê em têkoşîna xwe ya qanûnî û siyasî berdewam bikin.’’
Hesen Koçer di nav axaftina xwe de qala êrîşên li ser Rojava kir û got, ‘’Divê gelê me baş wate bide û bizanibe çima ev êrîş li ser Bakur û Rojhilatê Sûriyê hate kirin. Êrîşên ku hatin kirin, projeya edalet û wekheviya di navber gelan de hedefgirtin û li hember wê netewperestî pêş xistin, ji bo şer di nav civakan de gur kirin heta niha jî propaganda dikin. Divê em yekîtiya Kurdan ava bikin. Divê gelê me bizanibe ev êrîşên ku niha tên kirin berdewama komployê ye û dixwazin bi sekna netewperestiyê civakê jî tevlî vê komployê bikin. Tifaqa bi gelan re girîng e, divê helwestên me rast bin.’’
Hesen diyar kir ku divê kongreya netewî ya Kurdan were lidarxistin û ev got, ‘’Kongreyeke netewî ji bo Kurdan divê were avakirin. Ji ber ji bo Kurdan stratejiya zelal divê hebe. Nexwe ne tene wê Rojava biçe, wê başûrê Kurdistanê jî biçe. Ji ber xeteriyeke mezin li ser Başûrê Kurdistanê jî heye. Bila tewriyên din pêş nekevin wekî ku PKK vir heye, PKK xwe fesix kiriye, evên ku derdikevin jî çîrok in, dixwazin rengê ku berê komplo ser dimeşiya berdewam bikin û êrîşên xwe ser Serokatî û fikirê Serok berdewam bikin. Ev hevpeymana ku vê dawiyê hatiye kirin, ji aliyê Rêber Apo ve hate çêkirin. Ev komploya ku niha berdewam dike jî armanca wan ne Rojava ye, lê armanc tevahî Kurd in. Dibe ku tifaqa Iraq û Tirkan çêbibe û Başûrê Kurdistanê tengav bikin. Ji bo ku şerê Îranê bikin, wê Iraqê li gorî xwe saz bikin. Ji bo vê divê em bizanibin ku çawa li hember vê komployê têkoşîna xwe bidin meşandin. Bi netewperestiyê li dijî vê komployê têkoşîn nayê kirin, ancax bi yekîtiya Kurdan û tifaqên bi gelên din re parastin were avakirin.’’
Koçer anî ziman ku pêvajoya Aştî û Civaka Demokratîk girîng bû ji bo Kurdan û wiha pê de çû, ‘’Hevpeymana ku bi Sûriyê hate kirin, Serokatî da kirin û got ku divê ev êrîş ser Rojava çênebin. Ev êrîş berdewam bikin wê şerê Kurd û Tirkan ê bê dawî derkeve holê. Me 10 salan bi koalisyona navdewletî re li dijî DAÎŞ’ê şer kir lê ji bo berjewendiyên xwe di deqekî de dev ji her tiştî berdan. Rêber Apo ji bo parastina Kurdan pêvajoya aştiyê da destpêkirin. Pêvajoyeke girîng û stratejik bû ji bo Kurdan. Eger Rêber Apo ew pêvajo nedaba destpêkirin, wê komkujiyên mezin ser li Kurdan bihatana meşandin. Parastin ne tenê bi çekan e, mirov di warê siyasî de jî dikare xwe biparêze, êrîşên li ser Bakur û Rojhilatê Sûriyê jî ji bo têkbirina pêvajoya aştiyê bû. Divê em pêvajoyê û Rêber Apo baş fêm bikin. Projeya demokrasiyê bi erdnîgariyan ve nayê girêdan, bi zihniyet û fikir ve girêdayî ye. Entegresyona bi Sûriyê re jî rêbazek demokrasiyê ye.’’
Di berdewamiya axaftina xwe de Hesen Koçer bal kişand ser hevpeymana 30’ê Çileyê û wiha got, ‘’Ji bo Entegresyona ku di vê demên dawî de pêş ketiye, stratejiya wê ya giştî li ser esasê parastina taybetmendiyên Kurdan di aliyê, ziman û civakê de ye. Divê mafên Kurdan di destûrê de werin nivîsandin. Gava yekem Hêzên ewlekariya Şamê derbasî Qamişlo û Hesekê bûn. Çend lîwayên hezên leşkerî hatin bi rêxistinkirin ku tevlî nav artêşa Sûriyê bibin. Divê entegresyon li gorî çarçoveya hevpeymanê were çêkirin. Heta niha guman hene ku Tirk mudaxile bikin û tevlîheviyan çêbike, divê li hember van buyeran hişyariyên me hebin. Gavên ku hatine avêtin jî ne kêm in û divê li ser erdê jî pêk werin û divê zemînê şer nemîne.’’
Şêwirmendê Rêveberiya Xweser Hesen Koçer di dawiya axaftina xwe de bang li gelê Kurd kir ku li dijî komploya 15’ê Sibatê têbikoşe û got, ‘’Divê gelê me li dijî komployê têkoşîna xwe ya siyasî û civakî pêş bixin. Sekna gelê me yê li her çar parçeyên Kurdistanê û li Ewropa, ji bo parastina Rojava derket holê. Divê heman sekin li dijî komployê jî hebe. Gelê me çiqasê li ser piyan be, em ê ewqas bikaribin giraniya xwe di qada navnetewî de bidin pêş. Bi hevpeymanekê her tişt xelas nabe, têkoşîna Kurdan nû destpê dike, divê mafên Kurdan qanûnî bibin, ji ber heta nebin qanûnî misoger nabin. Divê gelê me li Ewropa û her çar parçeyên Kurdistanê xwedî li Rojava derkevin û li dijî komploya navnetewî sekna gelê me xwedî derketina li pêvajoya aştiyê ye.’’
