Hîkmet Akbaş piştî 31 salan ji Girtîgeha Ewlehiya Bilind a Tîpa F ya Boluyê hate berdan. Akbaş li pêşiya girtîgehê ji aliyê endamên MATUHAYDER û gelek kesan ve bi kulîlkan hate pêşwazîkirin.
Akbaş li pêşiya girtîgehê daxuyanî da û anî ziman ku ew ji aliyekî ve keyfxweşiya azadbûna xwe dijî û li aliyê din jî ji ber girtiyên nexweş ên li hundir xemgîn e.
Akbaş wiha got, “Ew qas hevalên me yên nexweş hîna li hundir in û ev me gelekî ne rehet dike. Tecrîd hîna nerabûye. Blok ji hevdu hatine qûtkirin. Hevalên nexweş li ber xwe didin, lê berdana wan ji aliyê îdarê ve tê astengkirin.”
Akbaş ragihand ku ku li Girtîgeha Boluyê polîtîkayên zextê dewam dikin û wiha got, “Di 2016’an de çawa be, îro jî heman e. Derketin me keyfxweş dike, lê parçeya me ya mezin Rêber Apo ye; heta ku ew azad nebe, gel azad nabe.”
Akbaş bal kişand ser “Pêvajoya Aştî û Civaka Demokratîk” a ji aliyê Rêber Apo ve hatiye destpêkirin jî û destnîşan kir ku paradîgmaya ku Rêber Apo pêş xistiye wê ji pirsgirêkên civakî re bibe çareserî.
Hîkmet Akbaş ê ku di sala 1995’an de li Edeneyê hate binçavkirin, ji aliyê Dadgeha Ewlehiya Dewletê ve cezayê muebetê lê hat birîn. Akbaş li Girtîgehên Konya, Girtîgeha Ewlehiya Bilind a Tîpa F ya Hejmar 2’an a Sîncanê û herî dawî jî li Girtîgeha Tîpa F ya Boluyê hate girtin.
